كود كازا ////

مشكلة اخرى تقدر تخسر العلاقات المغربية السينگالية. أمادو شريف ديوف كاتب دولة لدى وزير الاندماج الإفريقي والشؤون الخارجية والسنغاليين في الخارج، مكلف بالسنغاليين في الخارج، كان غادي لمصر. جا من داكار لكازابلانكا ومنها كان معول يمشي فطيارة لارام للقاهرة.

المشكلة بدات باش نزلات الطيارة. ما لقى حد يتسناه. حسب مصادر “كود” مشى فالنقل اللي كديرو لارام بحال كلشي. حسب مصادر “كود” المشكلة كانت سفارة السينغال فالرباط ماشي مطار محمد الخامس او لارام. لان هاد السفارة ما علماتش باللي جاي وزير. واشارت المصادر ل”كود” باللي مثلا ايلى كان وزير مغربي مسافر فمهمة رسمية راه سفارتنا فداكار اللي كتكلف بالامور البروتوكولية.

المشكلة ما وقفاتش عند النقل. باش وصل لقى طيارة كازا القاهرة مشات. لان رحلة داكار كازا تعطلات. فهاد الحالة الخطوط الملكية المغربية كتشد ليه اوطيل. حسب مصادر “كود” خدا اوطيل 4 نجمات اللي قريب من مطار محمد الخامس. هاد الشي ما عجبش كاتب الدولة. بغى 5 النجوم. حسب مصادر “كود” راه عطاوه اوطيل مزيان قريب للمطار ما بغاوهش يمشي حتى لوسط كازا ويتسخسخ. المهم هاد الشي قلق المسؤول السينغالي بزاف