كود – باريس//

المغرب مشارك كيف ديما فالدورة 62 ديال المعرض الدولي الفلاحي اللي منظم من 21 فبراير حتى لـ1 مارس 2026 باريس، وهاد المشاركة هي رقم 13 متابعة، حيث المغرب ولا حاضر بقوة فهاد الموعد العالمي الكبير اللي كيجمع عالم الفلاحة، التغذية والابتكار الفلاحي.

بهذه المناسبة وزير الفلاحة والصيد البحري والتنمية القروية والمياه والغابات، أحمد البواري، مرفوق بالسفيرة ديال المغرب ففرنسا سميرة سيطايل، ترأس نهار الأحد 22 فبراير 2026 تدشين الجناح المغربي، ودّار حتى لقاء ثنائي مع وزيرة الفلاحة الفرنسية آني جينيفار.

المشاركة المغربية جاية تحت شعار: “المغرب، قرون من النكهات”، وكتبين 30 مجموعة إنتاجية كتمثل 46 تعاونية وكثر من 740 فلاح صغير، من المغرب كامل، و61% منهم عيالات قرويات.

الجناح المغربي تبنا على مساحة 300 متر مربع، وكيعطي للزوار تجربة كتعكس تنوع المنتوجات المجالية ديال المغرب، بحال الأركان، زعفران تالوين، تمور المجهول، زيت الزيتون، الخروب، النباتات العطرية والطبية والتوابل.

الوزير أحمد البواري ونظيرتو الفرنسية آني جينيفار، تافقو على تعزيز التنزيل العملي لبرامج التعاون، خصوصاً فتربية البهايم، التكوين الفلاحي، السلامة الصحية والصحة النباتية، تدبير مياه السقي، وتقوية العلاقات بين المهنيين ديال البلدين، باش تكون فلاحة مستدامة وقوية.

المعرض الدولي للفلاحة فباريس كيتعتبر أكبر تظاهرة فلاحية ففرنسا ومن أهم اللقاءات العالمية فالمجال، كيكون فرصة لعرض المنتجات المجالية، تربية الماشية، الوراثة الحيوانية والابتكارات الفلاحية. وفدورة 2025، استقبل أكثر من 600 ألف زائر، الشي اللي كيأكد المكانة الدولية ديالو والإشعاع الكبير اللي كيحظى به.