وكالات //

نوضات  واحد اللائحة لي تنشرات فـ منصة ديال المبرمجين الشينوية CSND بزاف ديال الجدل، حيث بيّنات باللي مات على الأقل 76 باحث مازال ما وصلوش لـ60 عام فـ العشرة شهور اللُّولة من 2025، مقابل غير 44 حالة فـ عام 2024 كامل. ومن بين أصغر الضحايا كان دونغ سيجيا، عالم فالمحيطات فعمره 33 عام، لي توفى من بعد ما رجع من مسار أكاديمي زوين فـ ميريكان.

وبناءً على هاد الإحصائيات الأولية، تشعلو النقاشات فالسوشيال ميديا وفالجامعات. بزاف ديال الناس شافو أن هاد الأرقام كتعكس ضغط كبير وماسبقش بحالو داخل المؤسسات العلمية فالصين: منافسة قوية، كتابة مستمرة ديال طلبات التمويل، ومتطلبات أداء كيركزو على الكمية والإنتاج بزاف، على حساب الصحة النفسية والراحة ديال الباحثين.

ومع ذلك، حذر بعض الخبراء من الاعتماد الكلي على هاد البيانات، حيث قالو أن قاعدة بيانات CSND ماشي كاملة وممكن يكون فيها أخطاء فالتصنيف.

ولكن، بقى توقيت الجدل ملفت للنظر، خصوصاً من بعد ما ماتُو فشهر شتنبر اللي فات ثلاثة علماء شباب من جامعات كبيرة فالصين، وهو ما زاد الضوء على بيئة أكاديمية مرهقة، فيها التنافس القوي على الترسيم وقلة فرص التمويل، حسب تقرير لصحيفة ساوث تشاينا مورنينغ بوست.

وعلى مستوى الدراسات العلمية، بدات الصورة كتبان أكثر. فشهر أبريل 2025، نشر عالم الاجتماع كاري وو مع فريقو دراسة فمجلة Preventive Medicine Reports، ورصدو فيها 130 حالة انتحار فوسط الباحثين الصينيين بين 1992 و2024، أغلبهم طلبة وباحثين شباب، وكان كاين ارتفاع مع مرور الوقت. هاد النتائج، ومعاها دراسات أخرى على الضغط المهني، كيبينو أن المشكل نظامي وماشي فردي.