كود مديونة//

شْدْدْ رئيس حزب التجمع الوطني للأحرار، عزيز أخنوش، صْباح اليوم السبت فمديونة، أن أي مشروع سياسي مايمكنش ينجح بلا نزول للميدان وبلا مايسمع بصّح للمواطنين ويتفاعل مع ْالأولويات ديالهم.

هاد الكلام جا فالمحطة الْجديدة من الدورة ديال “مسار الإنجازات” اللي دايرها الحزب فبزاف دالجهات بالمغرب.

وقال أخنوش قدّام الحضور أن المنتخبين والفاعلين الحزبيين خاصّهم “يسمعو للناس ويخدمو معاهم باش يخلو المشاكل ديال كل نهار”، وزاد بأن التوجيهات اللي كيعطي للمسؤولين ديال الحزب دايماً هي نفسْها: “كونو حاضرين، دافعو على حقوق الناس، وسمعو ليهم بالاحترام والمسؤولية”.

زاد أخنوش قال أنه من خلال الجولات اللي داز تلاقى فيها مع بزاف ديال المواطنين، كاينين شي شهادات كتعطي أمل فالمستقبل، وشي شهادات اخرين كيبينو المعاناة الحقيقية لي “كتدوز للقلب وتتقلّب الخاطر”، على حدّ قولو. وهنا كيأكد أن هادشي كيحط على الحكومة والحزب مسؤولية كبيرة باش يقدّمو حلول واقعية ومستمرة.

وفهاد السياق، شدّْد أن تحسين التعليم باقي أولوية وطنية، وأكّد على ضرورة توفر تعليم مزيان وفابور لجميع التلاميد، وبين أن الحكومة كدير جهدها باش تعمّم “مدارس الريادة” اللي كيشوفها نموذج جديد باش يتحسّن التعليم ويتقادو الفوارق.

وأكد أخنوش أن المغرب دار خطوات مهمين فمسار التغيير، ولكن مازال الطريق طويل باش يبني “المغرب الصاعد” اللي هضر عليه الملك محمد السادس. وزاد باللي المرحلة الجاية خاصها شجاعة وصبر وثقة باش يكمل هاد الورش الإصلاحي الكبير.

وفالأخير، دعا أخنوش الناس باش يزيدو يعطيو الثقة لحزب التجمع الوطني للأحرار، حيت حسب كلامو كاين فريق “قادّر يساهم بقوة فبناء مغرب قوي وفيه العدل .، كيعطي الفرص وكيجاوب لتطلعات ديال جميع الفئات”.