كود الرباط//
قال عزيز أخنوش، رئيس الحكومة، بلي الحكومة تمكنات من تنزيل 28 مرسوم في هذه الولاية تخص تنزيل برامج التغطية الصحية لجميع المغاربة.
كلام أخنوش، اليوم فمجلس النواب فالمساءلة الشهرية لرئيس الحكومة، معجبش مصطفى الإبراهيمي برلماني من البي جي دي لي تنرفز وبدا يغوت بلا مياخد الكلمة من رئيس الجلسة رشيد الطالب العالمي.
الابراهيمي مخلاش أخنوش يكمل كلام وتحدا أخنوش وقاليه كتكذب ووو، أخنوش جاوبو: “ياك كنتي قلتي غادي تقدم الاستقالة.. علاش مقدمتيهاش”.
أخنوش قصد استقالة الإبراهيمي من البرلمان، حيث كان قال فتصريحات بلي: “يلى الحكومة شرحات لينا سبب سحب مشروع التغطية الصحية للوالدين”.
وكان فوزي لقجع وزير الميزانية سبق شرح للإبراهيمي بلي مكاينش سحب التغطية الصحية للوالدين، لأن مشروع الحماية الاجتماعية والتغطية الصحية ديال المغاربة كاملين بما فيهم الوالدين.
الغوات لي دار الإبراهيمي، مخلاش أخنوش يكمل هضرتو. وهادشي خلا رئيس فريق الأحرار محمد شوكي يتدخل ويقول بلي هاد السمفونية ديال البي جي دي خصنا نساليو معها كل مرة كيتهمو رئيس الحكومة بالشفرة ووزير العدل بالفساد والنقابات بالرشوة، مطالبا بالقطع مع هذا الخطاب البئيس.
دبا كيطرح سؤال كبير وسط البرلمان، واش الإبراهيمي غادي يقدم الاستقالة ديالو على كلامو بسبب التغطية الصحية للوالدين؟ ولا غادي يتمسك بملايين التعويضات لي كياخد فالبرلمان؟.
https://web.facebook.com/watch/?mibextid=wwXIfr&v=1618560825456595&rdid=nFJXQzJrEuwTk7s9