كود الرباط//

رئيس الحكومة عزيز أخنوش، كلاشا البي جي دي اليوم فجلسة الأسئلة الشهرية بمجلس النواب، فاش بغاو يحرجو فملف الاستثمار.

وقال اخنوش، فجواب على مداخلة البي جي دي :”جبنا 79 مليار درهم للمقاولات الصغرى كيتسالاوها للدولة ف tva، وخلصناها ف4 سنين، وهذا انجاز”.

واضاف اخنوش :”الميثاق الوطني للاستثمار لي جبنا ثورة، متقولوش لي تعطلنا، علاه فين كنتو هادي 26 عام. هادي 26 عام متبدلش قانون الاستثمار ف البلاد، هادي 26 عام لي عندو 100 مليون درهم كايطلع لجنة الاستثمار اش كيطلب معرفتش. مكاينش قانون اش كيتعطا، ودبا جابت الحكومة القانون والمراسيم وفيه كولشي بدقة وبشروط، والدعم مكيتعطاش حتى كيسالي الاستثمار واش تعمل ولا لا”.

وزاد اخنوش فرد على البي جي دي :”راه نتوما لي تعطلتو، راه 26 عام كنتسناو باش يولي الاستثمار ف مناطق بحال زاكورة يكون فيه دعم . الاستثمارات ب 100 مليون درهم كانو كيطلعو الرباط باش يتاخدو فيه قرارات والموافقة، دبا لا طلعنا الاستثمارات خصها موافقة من الرباط ل250 مليون درهم”.

واوضح اخنوش :”دار مجهود كبير باش نخرجو هاد ميثاق الاستثمار وكان فيه نقاش كبير بين مختلف القطاعات، واستطعنا نخرجو استثمارات ما فوق 50 مليون درهم ف عامين الاولى. وهذا شرف للحكومة”.