كود الرباط//

قال رئيس الحكومة، عزيز أخنوش، فتعقيبو على أسئلة المستشارين اليوم الاثنين، فالبرلمان، خلال جلسة المساءلة الشهرية اللي تم تخصيصها لموضوع “برنامج تقليص الفوارق المجالية والاجتماعية”، أن شي حاجة واقعة فالتعليم، وأن ما يمكنش نخليو هادشي، لأنه تا واحد من منتقديه ما يقدر يدير كثر من اللي دار، مؤكدا أن المغرب دولة ديال المؤسسات، وأنه ما يمكنش نخليو ولادنا رهائن.

وأضاف أخنوش باللي هادي ماشي مسؤولية الحكومة بوحدها، وإنما مسؤولية الآباء كذلك والجميع، هادي دولة ديال المؤسسات، وأقسم أن مبلغ 10 ملايير درهم اللي منح للأساتذة هو الشي لاخر اللي تعطا كذلك وغادي نديرو التقييم ديالو، هو من أجل تصحيح وضع الأساتذة فالماضي، وفوجه وليدات المغاربة.

وأكد مرة أخرى أن الباب مفتوح للحوار، وأن اللجنة اليوم اجتمعت مع النقابات الأربعة الممثلة للقطاع، وغادي نمشيو من هنا إلى نهاية الأسبوع فتدارس جميع الملفات اللي خاصها تعالج فإطار حوار مؤسساتي يرحب بالجميع بحسن النية.

وقال باللي ما يمكنش يحبسو الأساتذة القراية على ولاد المغاربة، وأن هادي مسؤولية الجميع، ودعا من جديد للحوار بهدوء، مشيرا إلى أن إمكانيات الدولة تبقى محدودة وأن كل ما تعمل كايبقى استثنائي.