كود اكادير – ت حسني دكالي ///

عزيز اخنوش رئيس حزب التجمع الوطني للأحرار قال باللي حزبو حزب “المعقول” و”الجدية” هدفو خدمة لمغاربة خدمة الاسرة المغربية.

لتحقيق هاد الشي طلب من منتخبي الحمامة فاللقاء الوطني لتقديم رؤية حزب التجمع الوطني للأحرار اللي تنظم البارح السبت 25 ماي 2024 فاكادير٬ التحلي بالجدية والتسلح بالعمل لخدمة المواطنين.

وقال ليهم باللي لمغاربة غاديين يعقلو على ما قدماتو الحكومة وغاديين يشوفو نتائجها ووعد بتحقيق منجزات كبرى فاللي بقى من الولاية الحكومية. دابا داز كثر من النص من هاد الولاية.

اخنوش تكلم كذلك كرئيس للحكومة وقال باللي الفريق اللي كيقودو ما كيضيعش ما سماه “الزمن التنموي للمغاربة”. واضاف “بغينا للمغاربة التنمية الشاملة، وطموحنا يطمئنوا المواطنين على مستقبلهم ومستقبل وليداتهم”

وكشف على الاستمرار فتوجه الحكومة التواصلي بتجنب صراعات خاوية مع الحلفاء٬ اذ قال باللي حكومتو غادية تجنب الدخول فصراعات ما عندها معنى او هدف مع حلفائها وباللي غادية تركز طاقتها كلها فخدمة مصالح المغاربة والالتزام بعهودها

اخنوش شدد على ان حكومتو صادقة وجادة وملتازمة بتعليمات سيدنا ووفية فتعهداتها مع المواطنين