كود الرباط//

كشف رئيس الحكومة، عزيز أخنوش، عن موعد انطلاق جولة الحوار الاجتماعي بين الحكومة والنقابات والباطرونا حول قضية القانون التنظيمي للإضراب، واللي تحدد يوم الخميس 11 يوليوز 2024 مباشرة بعد اجتماع المجلس الحكومي.

وقال أخنوش، اليوم بمجلس المستشارين: “كل نقابة طلبت نقط معينة فالاجتماع الأول لي تم”، مضيفا: “بلادنا غاتمشي فالاستثمارات والإنتاجية وغانشغلو ناس كثر وبغينا الأمور تكون واضحة وبغينا يكون توازن بين ممارسة الإضراب والعمل”.

وأضاف أخنوش: “سمعت بلي الإخوان فالنقابات كيقولو المشروع ديال القانون التنظيمي للإضراب لي كاين اليوم غير مقبول”، موضحا: “حنا فالوسط ويظهر لي بلي غانتوصلو لحل”.

وأكد رئيس الحكومة بلي “غانمشيو بالتوازن وغانكونو أب أسرة للجميع، لا نقابيين ولا رجال أعمال، واحد بغا يستثمر نعطيوه ضمانات وكذلك لي غادي يشتغل يلا بغا يدير الإضراب ويلا متخلصش خصو حقوقو”.

وشدد أخنوش بأن القانون التنظيمي للإضراب نهاية 2024 غايخرج بتفاهم مع النقابات ونكونو واقعيين ومنطقيين فحل الإشكالات، يعني نفضيوه فبداية 2025، مشدد بلي “ف2025 خصنا نهضرو على إصلاح أنظمة التقاعد”.

أما مدونة الشغل، قال أخنوش: “غانبداوها ف2026 يلا قدرنا نساليوها مزيان ويلا مقدرناش نخليوها للحكومة المقبلة”.