كود بني ملال//
أكد عزيز أخنوش، رئيس حزب التجمع الوطني للأحرار، أن القضية الوطنية الأولى ديال المغرب دابا كاتعيش لحظة مهمة بزاف، خصوصاً مع الزخم الدولي الإيجابي، بعد القرار التاريخي لمجلس الأمن ديال الأمم المتحدة اللي اعتمد مبادرة الحكم الذاتي كمرجعية أساسية لحل النزاع المفتعل على الصحراء المغربية.
وخلال كلمة ديالو فلقاء “مسار الإنجازات” اللي تنظم اليوم السبت فمدينة بني ملال، قال أخنوش أن القرار الأممي هو تتويج لمسار طويل ديال الدبلوماسية الملكية الحكيمة بقيادة الملك محمد السادس، وكيوضح كذلك الدعم الدولي المتزايد للمغرب فالصحراء.
زاد أخنوش وقال أن القرار الجديد كيعطي الفرصة لجميع الأطراف باش يتحاوروا ويتوصلوا لتوافق بنّاء ما كاينش فيه لا غالب ولا مغلوب، وكايحافظ على ماء وجه الجميع، واستدل بكلمة الملك فخطاب العرش، معبر على الأمل باش هاد التحول يكون بداية مرحلة جديدة ديال التنمية والازدهار فالأقاليم الجنوبية.
وختم أخنوش كلامو بالتأكيد أن الدور الريادي ديال الملك فالدفاع على الوحدة الترابية ديال المملكة باقي نموذج يحتذى به فبعد النظر وحسن التدبير، وأنو هو الحصن اللي خلى القضية الوطنية فمكان آمن من أي تطاول أو تشكيك، وجعل هاد السنة لحظة تاريخية للانتقال من منطق التدبير لمنطق التغيير فمسار وطني كيحدد ملامح مغرب موحد قوي بمؤسساتو ومواطنيه.
