عمر المزين – كود////

صدرات غرفة الجنح التلبسية فالمحكمة الابتدائية بمدينة فاس، زوال اليوم الثلاثاء، أحكامها فحق 4 ديال الأشخاص، وهم مول شركة للوساطة فالتشغيل ونوطير وجوج من الوسطاء، وذلك على خلفية ارتباطهم بشبكة إجرامية تنشط في النصب والاحتيال على الراغبين في الهجرة.

وحسب المصادر ديال “كود”، فإن الغرفة المذكورة برئاسة القاضي نبيل أزمور قررت عدم المؤاخذة ديال المتهمين الثالث والرابع من أجل “جنحة النصب”، والحكم ببراءتهما منها، وبمؤاخذتهما من أجل باقي المنسوب إليهما، ومؤاخذة المتهمين الأول والثانية من أجل المنسوب إليهما، بعدما دارت المحكمة إعادة تكييف فعل النصب اللي تنسب للمتهم الأول بالمشاركة في ذلك.

وحكمات الغرفة على المتهم اللول “محرز الولجي” بالحبس النافذ لمدة عامين وغرامة نافذة قدرها (2000) درهم وعلى الثانية “شيماء حازم” بالحبس النافذ لمدة أربع سنوات، وخطية نافذة قدرها (5000) درهم، وعلى كل واحد من الثالث “عبد السلام المجدوبي” والرابع “ادريس خرزوز” بالحبس النافذ لمدة 4 وخطية نافذة قدرها (2000) درهم مع تحميل المتهمين الصائر تضامنا دون إجبار.

المحكمة قررات باش ترجع باقي الباسبورات المحجوزة على ذمة هاد القضية، اللي كانت المديرية الجهوية لمراقبة التراب الوطني ففاس هي لي طيحاتها، لفائدة أصحابها والوثائق والملفات المحجوزة لفائدة من له الحق فيها والكاشيات والبورطابلات والبيسيات المحجوزة من المتهمة الثانية لفائدتها ومصادرة لفلوس المحجوزة منها لفائدة الخزينة العامة.

طبعا المحكمة عوضات الضحايا اللي عددهم كبير بزاف، وكاين اللي مزال محط شكايات ضد هاد الشبكة الإجرامية، والتعويضات تراوحت بين 2000 درهم و25 ألف درهم.

وكان الأبحاث والتحريات اللي دارتها عناصر الفرقة الجهوية للشرطة القضائية بمدينة فاس مع هاد الشبكة اللي احترفات فالنصب على الراغبين في الهجرة إلى الخارج، بينات أن العدد ديال الضحايا بزاف.

الضحايا اللي تعرضوا للنصب كلهم صرحوا للبوليس باللي تم تعريضهم للنصب والاحتيال عبر إيهامهم بتمكينهم من عقود عمل بالدول الأوروبية، خاصة دولة إسبانيا، وأن عملية استقطابهم تمت من خلال عدد من الوسطاء.