كود – وكالات//

فبريطانيا، 50 نائب من ستة أحزاب سياسية صيفطو رسالة لوزيرة الثقافة كيطالبو فيها يتحبس رسوم “ماشا والدب” على منصات بحال نتفليكس وITVXو حسب رأيهم، هاد المسلسل ماشي غير غير رسوم  ديال لوليدات ، ولكن كيتستعمل باش ينقل رسائل كتخدم صورة روسيا ونيقرب الرموز السوفياتية من دراري.

هاد الطلب جا من بعد ما علنات نتفليكس أنها شرات حقوق جوج مواسم جداد من المسلسل، النواب هضرو على حلقة قديمة كاتبان فيها ماشا لابسة كاسكيطة عسكرية فيها نجمة حمرا، ومن بعد كاسك ديال الدبابة، وقالو بلي هاد المشاهد كتخلي صغار يتقبلو الرموز العسكرية السوفياتية بشكل عادي.

الشركة المنتجة “أنيماكورد” نفات هاد الاتهامات، وقالت بلي خرجات من روسيا بشكل كامل من  2025، وإن إنتاج المسلسل ما كيتلقى حتى دعم من الحكومة الروسية، و حتى مسؤولين روس اعتابرو هاد الحملة مجرد محاولة لضرب نجاح مسلسل معروف فالعالم كامل.

أما الحكومة البريطانية، فما خرجات حتى لدابا بأي قرار كيمنع عرض “ماشا والدب”، وقالت بلي هاد النوع ديال القرارات كيبقى من اختصاص منصات البث، مادامت كتحترم القوانين المعمول بها.