أميمة عطية – كود كازا ///

حذرات السلطات الصحية فسبتة من تلوث لما ديال شاطئ “ترامبولين”، بحيت لقاوه موسخ ، بعدما كشفت تحاليل ميكروبيولوجية على مستويات مرتفعة بزاف ديال البكتيريا فلما د البحر ، فوسط وجود ما لا يقل عن 3 آلاف حراك فالمنطقة.

وفهاد السياق ، حالت السلطات المحلية فسبتة نتائج هاد التحاليل على الحكومة المركزية الإسبانية، باعتبارها الجهة المختصة بهاد الفضاء، وطالبت باتخاذ إجراءات عاجلة لحماية الأشخاص اللي كاينين فالمنطقة.

وحسب المعطيات المنشورة في الإعلام الإسباني ، فهاد العينات اللي تجمعات أيام 23 و25 و28 شتنبر كشفت على تركيزات مرتفعة بزاف ديال البكتيريا المعوية، من بينها المكورات المعوية وبكتيريا “إشريكية قولونية” (E. coli)، والنتائج تجاوزات بشكل واضح الحدود المعتمدة بالنسبة لمياه السواحل المخصصة للاستحمام.

وحسب المعطيات الصحية المتوفرة، التحذير مرتبط بالمخاطر الصحية المحتملة اللي يقدر يسببها ملامسة المياه الملوثة، فيما التقرير ما حددش مصدر هاد التلوث.

ومن جهة أخرى ، حكومة سبتة صيفتات التقرير الصحي حتى لوزارتي الصحة والهجرة الإسبانيتين، وطالبت بتدخل عاجل للتعامل مع الوضع.

وأكدات مصادر من المدينة أن التقنيين المحليين دارو هاد التحاليل رغم أن الإدارة المحلية ماشي هي المختصة فتدبير الشاطئ، وذلك بهدف رصد المخاطر الصحية المرتبطة بوجود أعداد كبيرة من الأشخاص فالمنطقة.

ودابا السلطات فسبتة كتطالب بتدابير مستعجلة لحماية صحة الحراكة المتواجدين فالشاطئ والحد من المخاطر الناجمة عن التلوث الميكروبيولوجي اللي بيناتو آخر التحاليل

هاد الاكتشاف حا من بعد ما دارت مصالح الصحة فسبتة تحاليل ميكروبيولوجية لمياه الشاطئ، على خلفية التجمع الكبير ديال الحراكة فالمكان منذ أزمة الهجرة اللي عرفاتها المدينة فأواخر يوليوز الماضي.

.