أميمة عطية – كود كازا ///

سجلت المصالح الصحية فمدينة سبتة خمس حالات مؤكدة بالسيدا فيروس نقص المناعة البشرية (VIH) وسط لحراكة اللي دخلو للمدينة فإطار موجة العبور الجماعي ديال 29 يوليوز لي فات ، مع 13 حالة ديال السل، حسب آخر تقرير وبائي أسبوعي للجنة التقنية لتنسيق الصحة العامة، اللي نشرت معطياتو صحيفة «El Pueblo de Ceuta».

وحسب ما نشراتو الصحيفة الإسبانية، فالمعطيات المحينة حتى لـ27 أكتوبر كتكشف أن الحالات الخمس ديال فيروس نقص المناعة البشرية تسجلات من بعد أزمة الدخول الجماعي.

وفنفس السياق، رصدات المصالح الصحية جوج حالات ديال التهاب الكبد الفيروسي من النوع «سي»، وحالة وحدة من النوع «بي» وسط لحراكة، و ما تسجلاتش حتى إصابة جديدة بهاد الأمراض فهاد السيمانة لخرا .

أما بالنسبة للسل، فالتقرير عرض 13 حالة وسط لحراكة اللي وصلو لسبتة من نهاية يوليوز، مقابل ست حالات أخرى وسط فئات ماعندها علاقة بتدفقات الهجرة.

وخلال الأسبوع الأخير بوحدو، تسجلو جوج حالات جديدة ديال السل مرتبطة بلحراكة، وحالة وحدة فالمجموعة الثانية.

ولائحة الأمراض اللي تضمنها التقرير شملت حتى 13 حالة ديال جدري الماء، وحالة وحدة ديال جدري القردة «Mpox».

ومن جهة أخرى، الأرقام كتكشف على الضغط اللي عرفاتو الخدمات الصحية فالمدينة من بعد موجة الدخول الجماعي، بحيث سجل قسم المستعجلات بالمستشفى الجامعي فسبتة 25 ألف و971 تدخلا بين 29 يوليوز و27 أكتوبر، من بينها 5667 حالة ظهرت عليها أعراض أو متلازمة صحية واحدة على الأقل.

وخلال الأسبوع الممتد من 21 حتى لـ27 أكتوبر، استقبلات المستعجلات 1784 حالة، من بينها 365 حالة تم فيها رصد أعراض أو متلازمات مرضية.

وحتى الوحدات الصحية الأخرى، خارج المستعجلات والرعاية الصحية الأولية، سجلت 13 ألف و363 تدخلا من نهاية يوليوز، من بينها 1968 حالة مرتبطة بأعراض صحية محددة.