كود سبور//

دارو الوداد الرياضي أول حصة تدريبية لهم فالعاصمة التنزانية دار السلام اليوم الاحد، وهاد الشي استعدادا لمواجهة سيمبا التنزاني الثلاثاء الجاي ضمن الجولة 4 من دور مجموعات دوري أبطال إفريقيا.

وتدارت الحصة التدريبية ديال الوداد فواحد التيران صغير د التداريب فالعاصمة التنزانية دار السلام وفراتو إدارة الواك، وشرف  على الحصة التدريبية المدرب الجديد فوزي البنزرتي والطاقم التقني ديالو، وعرفت مشاركة جميع اللاعبين، وكان المدرب التونسي واقف براسو على التمارين اللي تجرات فأجواء حماسية.

وبعدما سالاو الوداد الحصة التدريبية رجعو لفندق إقامة الفريق، باش يرتاحو ويتعشاو وينعسو في انتظار غدا الاثنين، اللي غتكون فيه حصة تدريبية أخيرة قبل الماتش غتكون فالملعب الوطني فين غتلعب المباراة ضد سيمبا، وقبل منها غتكون ندوة صحافية ديال المدرب فوزي البنزرتي.