كود -الراشيدية //
واحد الاكتشاف علمي فالمغرب تنشر نهار 20 ابريل فمجلة Historical Biology كيبيّن باللي الباحثين المغاربة لقاو لأول مرة آثار ديال واحد النوع ديال الوزغات تسمات Maroccoichnus aitsaidorum اللي راجعة للعصر الجوراسي، يعني قبل تقريباً بين 164 و168 مليون عام، هاد الآثار تْلقاو فجبال الأطلس الكبير ، وبالضبط حدا مسمرير.
الفريق العلمي كان بقيادة عمر آيت حدو من جامعة سيدي محمد بن عبد الله ففاس، وخدمو على لوح صخري فيه 12 أثر ديال الرجلين واليدين ديال هاد الحيوان.
هاد الاكتشاف مهم حيث هو الثالث من نوعو فالعالم، ومن قبل كانو غير فـ الولايات المتحدة و إسبانيا. وكيأكد باللي هاد النوع ديال الزواحف كان عايش حتى فالقارة الإفريقية فداك الوقت، وكيعطي فكرة على تبادل الحيوانات بين شمال إفريقيا وأوروبا فداك العصر.
الباحثين شافو حتى باللي البيئة ديال داك الوقت كانت فيها ديناصورات وزواحف صغار،وتوقعو باللي المنطقة مازال فيها بزاف ديال الاكتشافات المهمة فالمستقبل.
