كود – وكالات//

كيواجه أب وبنتو من أصل بولندي، عايشين فولاية نيوجيرسي الأمريكية، عقوبات قاصحة تقدر توصل حتى لـ20 عام ديال الحبس وخطية ما كتقلش على 1.9 مليون دولار، بسبب شبكة ديال تزوير الأعمال الفنية.

فظرف خمس سنين ما بين 2020 و2025، قدرو هاد الجوج يروجّو كثر من 200 عمل فني مزور، وداروهم فمعارض ودور المزادات فعدد كبير من المدن الأمريكية، وكانو كينسبو هاد الأعمال لفنانين عالميين كبار بحال Andy Warhol وBanksyوPablo Picasso وRichard Mayhew.

المتهمين، اللي سميتهم إروين بانكوفسكي وبنتو كارولين، اعترفو قدّام محكمة فدرالية فبروكلين بلي دارو نصب إلكتروني، وكانو كيغلطو المشترين بواحد الطريقة مدروسة، حتى قدرو يربحو على الأقل جوج مليون دولار.

باش يقنعو الناس، ما وقفوش غير عند تزوير اللوحات، ولكن زادو زوّرو حتى الوثائق ديال الملكية provenance)، ودارو بحال إلى هاد الأعمال كانت فمجموعات خاصة ولا معارض معروفة من قبل، وزادو صنعو طوابع مزورة وشهادات ديال الأصالة، وركبوها فوق أوراق باينة قديمة باش تعطي مصداقية.