كود سبور//

كشف عبد الله طالبي الأب ديال شمس الدين طالبي نجم بروج البلجيكي، أن العلاقة بين ولدو والاتحاد البلجيكي ما بقاتش مزيانة، وبالمقابل فالعلاقة ما بين اللاعب والجامعة الملكية المغربية لكرة القدم مزيانة، وأن الإصابة اللي تعرض لها كان عندها دور وممكن تحسم فالاختيار ديالو للمنتخب اللي باغي يلعب معه.

ونشرت جريدة “Nieuwsblad” البلجيكية، تصريح لعبد الله طالبي أب شمس الدين طالبي، كشف فيه أن العلاقة بين ولدو والاتحاد البلجيكي لكرة القدم تهرست، وهذا الشي حيث اللاعب توعت وتقطعو له ليگامون وحتى حد من الاتحاد البلجيكي ما تواصل معه باش يسول فيه ويطمن على الحالة الصحية ديالو، واخا لعب مع الفئات السنية فالمنتخبات البلجيكية.

وبالمقابل، وضح والد طالبي، أن الجامعة الملكية المغربية لكرة القدم، كانت ديما فتواصل مع شمس الدين طالبي ملي كان صغير، باش يقنعوه يلعب مع المنتخب الوطني المغربي، ونائب رئيس الجامعة الملكية المغربية لكرة القدم ومدرب المنتخب المغربي لأقل من 20 عام وأقل من 23 عام، ديما كايتواصلو معه باش يلعب مع المغرب، وحتى ملي توعت كانوا ديما كايسولو عليه وحتى فمرحلة إعادة التأهيل ديالو بدنيا بعد الإصابة، وعرضو عليه للمغرب باش يجي للرباط يشوف البنية التحتية الرياضية، وقالو له “غير جي وحنا نقطعو لك الطيارة”.