الرئيسية > آراء > آ الشيخ سار سير تكمش شكون داها فيك؟ العيالات المغربيات واصلات ونتا قتلك الحسد والغيرة حيت بيطالي.. وتربية الدراري مسؤولية الراجل حتى هو و”لاكريش” ربات أجيال والدراري ترباو فيها مزيان وقراو وتعلمو وخرجو ماضيين على جوج جيهات ماشي بحالك
30/06/2020 14:00 آراء

آ الشيخ سار سير تكمش شكون داها فيك؟ العيالات المغربيات واصلات ونتا قتلك الحسد والغيرة حيت بيطالي.. وتربية الدراري مسؤولية الراجل حتى هو و”لاكريش” ربات أجيال والدراري ترباو فيها مزيان وقراو وتعلمو وخرجو ماضيين على جوج جيهات ماشي بحالك

آ الشيخ سار سير تكمش شكون داها فيك؟ العيالات المغربيات واصلات ونتا قتلك الحسد والغيرة حيت بيطالي.. وتربية الدراري مسؤولية الراجل حتى هو و”لاكريش” ربات أجيال والدراري ترباو فيها مزيان وقراو وتعلمو وخرجو ماضيين على جوج جيهات ماشي بحالك

عفراء علوي محمدي- كود//

هذاك خونا اللي ماعرفت اش سميتو.. إيه داك خونا اللي كَلس بلا خدمة ويعاير فالعيالات والبنات اللي قاريات وخدامات، وقاليك آسيدي رافض كل الرفض أنهم يتزوجو حيت “غايلوحو ولادهم فلاكريش”، بربي واش هذاك وجهو ولا قفاه؟ شكون داها فيه بعدا؟ واش جاتو الغيرة والحسد من العيالات الحرات اللي خدامات وحسن منو ومن بزاف بحالو؟

مال هذ “لاكريش” اللي فرع لينا بيها راسنا؟ كاتب عشرين سطاتي وكَالس يهلل..حنا نمشيو معاه فنفس المستوى ونديوه على قد عقلو .. الناس كبرو فيها وترباو مزيان وتعلمو على سن صغيرة اللغات وطلعو مجبدين ونزوقا وقراو فالبريفي وكونو مستقبلهم وولاو ماضيين من جوج جيهات.. آش دار هو؟ طفرو؟ آش قرا؟

الراجل والمرا فاش كيخدمو بجوج الولد كيعيش أحسن عيشة، إلى كانو شي وقيتات مامساليينش وخدامين وهو كان فلاكريش أو عند العائلة شنو المشكل؟ راهوم كايرجعو عندو فالويكاند، واللي حل عليها فمو كتحضر، ويكسيوه مزيان ويشريو ليه أحسن الألعاب، وحيت المرا قارية وخدامة كتدير معاه ليدوفوار ديالو وتعاونو وتفهمو، أما إلى كانت ماقارية حتى زفتة وماخداماش فيستحيل بخلصة وحدة الدراري يقراو فمدارس مزيانة، ومهوم تفهم ليهم شي وزة فقرايتهم.

وحاجة خرا خاص الناس يفهموها، خصوصا واحد بحالك ماعندوش كَرام دالمسؤولية: تربية الدراري ماشي حكر على المرا فقط، الراجل بصفتو أب كذلك من الواجب عليه يربي ولادو، حيت كل واحد خدام على راسو وكينفق ويصير خاص التساوي فجميع المسؤوليات، ولنفترض هذ الدراري “ضاعو” كيف كتقول فراه المسؤولية كيتحملوها الواليدين بجوج، ماشي المرا بوحدها.

بلا مانهضرو على المتخلفين الفاشلين اللي كيأيدو هذ الهدرة، واللي خايفين يتزوجو مرا حسن منهم ، كاين واحد الفئة خرى كيقليك ما قاله الشيخ سار يدخل ضمن “حرية التفكير والرأي”، واللي حتا هوما ماقادرينش يفرقو بين حرية الرأي والعنف والعنصرية والتمييز والسبان والتعدو على حقوق الناس .

هذ الهضرة المتخلفة اللي قال هاد خينا ماشي رأي أصلا أو فكرة، هذا تمييز بين الرجال والعيالات، هذا تهجم على العيالات اللي ختارو يشقو طريق النجاح، وانتقاد لاختياراتهم باعتبار بلاصتهم فالدار والراجل هو الوحيد اللي من حقو يدير هذشي، بينما هي خاصها تختار وحدة من الجوج: تقرا وتخدم أو تتزوج وتدير الدراري، وماشي من حقها تديرهم بجوج، وهذي مصادرة لأبرز حقوقها والدراسة والشغل والإنجاب وتكوين أسرة، وهي الحقوق اللي كتكفلها جميع المواثيق الدولية لكَاع البشر.

وفالأصل، مامنحقش الراجل يفرض على مرا واش تخدم ولا تكَلس أو تتزوج، حيت هي حرة ومن حقها تدير اللي بغات، إلا إلى كان كيقلب على مرا مهرس ليها الراس وضعيفة الشخصية وبدون كرامة باش يتحكم فيها كيف بغا ويديرها تحت الصباط، حيت صعيبة عليه المرا القارية والواعية اللي حسن منو.

وباش مايبقاوش كل مرة يخرجو بحال هذ المتخلفين والمعقدين الحقدين على المرا ينشرو الكلاخ والميزوجينية، خاص البنات والعيالات يعيقو بالقالب، ويديوها فقرايتهم ويضمنو مستقبلهم، ومايفرطوش فخدمتهم، ويفهمو أن العيالات مايمكن يعيشو بعز وكرامة إلا إلى خدمو واستقلو بذاتهم ومابقاوش يعولو على الراجل يصرف عليهم، وهكذا عمرو يقدر يتحكم فيهم أو يقوليهم آش يديرو وآش مايديروش وواش يخدمو ولا مايخدموش.

موضوعات أخرى