كود الرباط//
قال هشام آيت منا، رئيس جماعة المحمدية، في اتصال مع “كود” بلي مكانتش كسيدة بين لجنة الفيفا لي جات تزور المدينة في إطار استعدادات المغرب لمونديال 2030، (كسيدة) مع كرويلة.
وأوضح آيت منا لـ”كود”، بلي لي وقع هو أن قبل ما توصل لجنة الفيفا بشي ساعة ونص تقريبا، كانت كرويلة فشي رومبان وكانت كتزيرو المرور فيه وتحيدات، ومكانتش كسيدة.
وشدد ايت منا بلي سبق له بصفته رئيس المجلس البلدي لمدينة المحمدية أن راسل عامل الإقليم باش يتم تطبيق قرار إزالة الكرويلة من شوارع المدينة.
هاد المراسلة لي دار ايت منا قبل للعامل، لم تنفذ، ودبا العامل باغي يحمل المسؤولية للمنتخب. وكيف ديما العامل هو الواعر ومخصوش يتحاسب، وراه جات الوقت نيت هاد العامل يطير، كيفاش لجنة الفيفا جايا ومقدرش هاد العامل يقاد المدينة، علما أن الجميع كيعرف بلي قوة ونفوذ وصلاحيات العامل أقوى بكثير من رئيس جماعة.
القصة ديال هاد الفيلم هو أن ايت منا كان صرح فدورة أكتوبر لجماعة المحمدية، قبل أيام فقط، بلي لجنة تفتيش تابعا للفيفا خرجات من ملعب البشير وكانت غادير كسيدة مع كرويلة. وبلي هو داير خدمتو وراسل السلطات باش يحيدو هاد العربات المجرورة.
