كود سبور//

دور هشام آيت منا رئيس الوداد الرياضي البارابول لجهة الدولي المغربي حكيم زياش بعدما سمعو تفارق مع الدحيل القطري.

وكشفت مصادر مطلعة، أن هشام آيت منا كايحاول يتواصل مع محيط حكيم زياش، باش زعما يجي اللاعب يلعب مع الوداد الرياضي فكأس العالم للأندية، ومعتمد فهاد الشي على نور الدين أمرابط اللي يالاه سنا مع الوداد وحتى شي لاعبين دوليين سابقين صحابو زياش باش يقلقل السوق، ويعرف واش يقدر يدخل فمفاوضات مع اللاعب ولا بلاما يزعم.

وكاتبقى الصفقات اللي دار هشام آيت منا فالوداد الرياضي، مثيرة للجدل، وأغلبها فيها شكون واش تقدر تعطي إضافة للفريق الأحمر أو أنها غادي غير تأزم النادي ماليا، مع العلم أن الوداد بان أنه كايعاني فالجوج ماتشات الوديين اللي فاتو ضد إشبيلية وبورتو السيمانا الماضية، وهذا الشي قبل أيام قليلة على انطلاق منافسات كأس العالم للأندية اللي غايلعب فيها ضد مانشستر سيتي ويوفنتوس والعين والوداديين حاطين يديهم على قلوبهم وخايفين من شي مستوى كارثي فالمسابقة.