سهام البارودي – كود//

عافاك آ حاتيم

عافاك آ حاتيم

ياك آ حاتيم

مابقيتيش ضريف معايا آ حاتييم !

هاد الحوار لي قريتو مادارش بين شي بنت و صاحبها “حاتيم” لي مابغاش يخرج معاها نهار السبت يدورها فالمول!  هاد الحوار دار بين “صحفية” و المغني حاتم ايدار حيت ماقبلش يجاوب على واحد السؤال طرحاتو عليه. و قبل من هاد الصحفية ! تفرجت ففيديو ديال جوج ديال الصحفيات محاميات ( فحال الشكل ديال المحامية د الحمام) على المغنية منال حيت رفضات تجاوب على سؤال ” واش نتي حاملة آ منال” ؟! آ تسنط آ بعرور شوف ليا السؤال لي كايطرحو الصحفيات كي داير ! واش حاملة آ منال ؟ فحال واش نعستي مع راجلك البارح آ منال ؟

و الطامة الكبرى انه فاش رفضات منال تجاوب على هاد السؤال ناضو الصحفيات كايتهجمو عليها و آه حقا ما حقا حنا لي طلعنا نقدرو نهبطوك ! آه حقا ما حقا ماتمصي علينا الحامض … و شي هضرة ماعند دينمها تا معنى!

هاد جوج مواقف كايعطيو نبذة على المستوى لي وصلات ليه الصحافة فالبلاد ! ايه حنا بلاد كاتموت على التفاهة و شاهد زوجة اكنوان اكشوان ترد على مول الخاتم ! و حصري جواد قنانة يفجرها في وجه دنيا بطمة و هاد النوع من المقالات و الفيدويات الرديئة لي كايموت عليها الانسان الرديئ ذو الذوق الرديئ! ايه هادا هوا البيزنيس و هادشي لي بغات الوقت و هادشي باش كاياكلو اغلب لمواقع الصحفية الخبز !

ولكن ماشي تال هاد الدرجة عاوتاني آ خواتاتي الصحفيات لي قطر بيكم السقف ! ماشي تال هاد الدرجة من التماهي مع تابوزباليت لي كاينة فالشارع ! ماشي ضروري تهزو لينا البراكص د الزبل و تخويوهم على راسنا فالفيديوات و البرامج و التصريحات … تقدرو ترتقوا شوية ! تساهمو شوية فتطلاع النيفو ! غا شوية ماشي بزاف حيت بزاف صعيب عليكم !

لي خاص بعض الصحفيين و الصحفيات يفهموه انه من حق اي واحد فنان او شخصية عمومية انه يختار شنو يتقاسم مع الجمهور و شنو يخلي لراسو ! ياكما سمعتو ديك القضية ديال السلطة الرابعة و تيقيتو راسكم غاتوقفو على بنادم فوق راسو و تبززو عليه يجاوبكم و يستحمل اسئلتكم التافهة ! من حق الفنان يجاوب على لي بغا ! و حاجة مهمة اخرى: فنانة فحال منال مثلا ماصنعتوهاش نتوما ! صنعات راسها براسها ! بستيل ديالها ! بصوتها و اختياراتها الفنية الذكية ! شحال من فنانة عندنا قارية ؟ شحال من فنانة عندها ذكاء منال ؟ و اختيارات منال ؟ و ستيل منال ؟ و شروط النجومية لي متوفرين فمنال ؟ و تبوگيصة منال ؟ و الفرونسي د منال ؟ ماشي بزاف ! قلالات ! دونك خليو لينا آ سيادنا داك شويش د الضو لي كانشوفو فديك البنيتة ! شوية د النقا و الزين و الثقافة و الكاريير المقادة …. حاسة براسها و من بعد ؟ و علاش حتى ماتكونش حاسة براسها ؟ راه ماشي مرت خوك باش تعاملي معاها خايب حيت حاسة براسها ! اغلب الفنانة العالميين حاسين براسهم و من حقهم لي عندو علاش علاش لا ؟

ثم ! علاش كاتحاسبو مع منال حيت ماكاتبغيش تجاوب على اسئلتكم التافهة علما انه مسؤولين كبار فالدولة ماعمرهم حاشاوها ليكم و لمنابركم الاعلامية ! و لا حيت منال حويط قصير ؟ دغيا خرجتو كاتنوحو واك واك الاعلام المغربي ! واك واك ماحتارماتناش ! واك واك نطلعوها و نهبطوها ! تااااااش غالطعو آش ؟

آش؟

ايكنوان ايكشوان

نيبا

مول اللفعة

….

هاد الناس لي كاتقدو طلعو هاد الساعة.