سعيد بوناصر – كود //

توصلات “كَود” من مصادرها لبارح صور كتبين كيفاش مشروع كبير دارتو وكالة “مارتشيكا” فالناظور، اللي هو كورنيش ديال لمدينة، مقطوع الضو العمومي على النص ديالو، فحين بلايص أخرين مشعول فيهم بشكل عادي.

هاد المسألة خلقات تساءل فوسط نشطاء المنطقة، وخصوصا ساكنة “حي شعالا”، اللي قريب من الكورنيش، بحيث قالو بللي هاد الأعطاب ولات كتوقع مرات كثيرة طول السنة، اللي مزال مافهموش السبب ديالها.

“كَود” اتاصلات بمسؤول فشركة الضو ديال المدينة، وقال بللي المسؤولية ماكيتحملهاش المكتب الوطني للكهرباء، بل المجلس الجماعي هو اللي خصو يتحمل مسؤوليتو فقطع الإنارة العمومية، حيث هو اللي كيدبر هاد الإنارة العمومية ديال المدينة، وأكد بللي التقنيين ديال الشركة كيتدخلو فحدود المسؤولية ديالهم إلا كان شي عطب ولا شي مشكل، ورغم محاولة “كَود” فالاتصال برئيس الجماعة مانجحاتش حيث بقا تيليفونو كيصوني بلا جواب.