كود سبور//

فالوقت اللي كرة القدم النسوية ولات شعبيتها كاتكبر بالمغرب، وكاتعطيها الجامعة الملكية المغربية لكرة القدم اهتمام كبير، صدر قرار مثير للجدل بإقامة فينال كاس العرش لكرة القدم النسوية برسم الموسم الرياضي 2023-2024، فتيران بإمكانيات متواضعة بزاف.

وغايتلعب ماتش الفينال ديال كأس العرش لكرة القدم النسوية بين الوداد الرياضي والجيش الملكي يوم السبت 17 ماي 2025، على أرضية ملعب سيدي يوسف بن علي بمراكش، ابتداء من الساعة الرابعة عصرا، وهذا التيران راه تلعب فيه الدومي فينال البارح الخميس، والإمكانيات ديالو متواضعة بزاف، وكانوا كايلعبو فيه الكوكب المراكش خلال هذا الموسم ومسلكين به حيث ما عندهمش فين يلعبو بسبب إغلاق التيران الكبير ديال المراكش للإصلاح، وتيران الحارثي.

هاد تيران سيدي يوسف بنعلي راه الإمكانيات ديالو متواضعة بزاف، والعشب ديالو اصطناعي، والمدرجات ديالو ما فيهاش الكراسا والحالة ديالو راه لا تليق باش يتلعب فيه فينال ديال مسابقة بقيمة كأس العرش، والماتش غايبدا مع 4 العشية حيث ما كاينش فيه الضو.

راه إقامة نهائي كأس العرش فهاذ الملعب اللي الإمكانيات ديالو متواضعة، كايضرب المجهودات اللي كاديرها الجامعة الملكية المغربية لكرة القدم، للتشجيع على ممارسة الكورة النسوية، وكايخلي الجمهور يطبع مع الذكورية وعلى التمييز بين المرأة والرجل، وأن الفينالات ديال كأس العرش رجال يتلعبو فتيرانات مزيانين، وحيث فينال كأس العرش لكرة القدم النسوية ديال العيالات هانيا يتلعب فتيران بإمكانيات ضعيفة حيث غير العيالات.

طبعا هذا الشي راه ما خاصوش يكون، والفينال ديال كأس العرش د العيالات خاصو يتلعب بحالو بحال فينال كأس العرش د الرجال، فتيران بإمكانيات مزيانة، وهذا الشي غايخلي العيالات اللي كايلعبو الكورة يحسو بالحگرا، وماشي فقط لاعبات الوداد الرياضي والجيش الملكي طرفي النهائي.