كود الرباط//

السياسة فالمغرب مبقاش عندها منطق بسبب السلوكات والتصرفات ديال مسؤولي بعض الأحزاب، اللي حاطين رجل في الأغلبية ورجل في المعارضة .

الكلام هنا على ادريس لشكر، الكاتب الأول لحزب الاتحاد الاشتراكي اللي اختار يزاوك فرئيس الحكومة عزيز أخنوش باش يدخلو للحكومة عبر حوار مع جريدة “العربي الجديد” القطرية . إيوا هادي هي فين وذنك هاهي. غادي حتى لجريدة قطرية باش يزاوك، في حين أن طريقة الدخول للحكومة عندها الوسائل والآليات ديالها اللي كيعرفهم لشكر.

المهم لشكر داير حالة فراسو ورجع ضحكة وسط السياسيين، واش كاين شي واحد تيدير حملة باش يطيح الحكومة من خلال ملتمس الرقابة ويطلب باش يدخل ليها؟ يتساءل مصدر من الأغلبية .

مصدر كود، أكد أن ادريس لشكر كيضيع وقتو، وكيحاول يوهم بعض قيادات الحزب أنهم ممكن يكونوا في الحكومة.

ادريس لشكر كان قال لصحيفة العربي الجديد  “نعتقد في “الاتحاد الاشتراكي” أن البلاد مفتوحةٌ على أوراشٍ كبرى، مطروح فيها برامج كبرى، من قبيل كأس العالم 2030 ومشروع النموذج التنموي الذي وقع الإجماع عليه. ويبدو لي أن الموقع الطبيعي للحزب أن نكون داخل الحكومة، وليس في المعارضة. وفي حال فرض علينا موقع المعارضة فسنحرص على تأدية دورنا الرقابي”.

دبا لشكر تيعتبر المعارضة مفروضة عليه ماشي غريب يدير شي تنسيقية ديال الأحزاب اللي فرضت عليهم المعارضة بحال الأساتذة اللي فرض عليهم التعاقد ويطالب حتى هو بالادماج. هادشي بزاف.