الرئيسية > آراء > آش هاد الجهل لي غارقين فيه ؟ واش هاد الخريف لي كاتعاودو فيه ؟ القايدة من حقها تمنع واحد مصدع عباد الله بالقرآن كيما من حقها تمنعو لاطلق ليهم الليدزيبلين! راه دولة هادي ماشي زريبة لي رشقات ليه شي حاجة يديرها !
02/04/2020 18:00 آراء

آش هاد الجهل لي غارقين فيه ؟ واش هاد الخريف لي كاتعاودو فيه ؟ القايدة من حقها تمنع واحد مصدع عباد الله بالقرآن كيما من حقها تمنعو لاطلق ليهم الليدزيبلين! راه دولة هادي ماشي زريبة لي رشقات ليه شي حاجة يديرها !

آش هاد الجهل لي غارقين فيه ؟ واش هاد الخريف لي كاتعاودو فيه ؟ القايدة من حقها تمنع واحد مصدع عباد الله بالقرآن كيما من حقها تمنعو لاطلق ليهم الليدزيبلين! راه دولة هادي ماشي زريبة لي رشقات ليه شي حاجة يديرها !

سهام البارودي – كود//

الصراحة الصراحة ! داك الفيديو ديال بنت داك الراجل لي لقاتو القايدة طالق القرآن و منعاتو و خرجات كاتغوت فيه على حقها فأنها تفرع لعباد الله راسها و تقلق راحتهم و واك واك واش القرآن ولا جريمة واك واك حنا ساحرين لينا ! راه خاصو يتعرض فشي جامعة ديال علم النفس و يتقرا للطلبة باش يفهمو تأثير الفكر الخرافي على عباد الله و كيفاش انه فاش كاتكون بعيد فمخك على العلم و المنطق كاتبقى غا كاتخرا و تستف و بكل فخر حيت كايصاحب ليك راسك راك قضيتيها زعما ! كاتدوي و كاتغلض صوتها زعما راه كاتمارس ” الذوذ عن دين الله” ! و كاطرح دوك الاسئلة العبيطة البسيطة ” واش القرآن جريمة ” ” واش حنا فدولة اسلامية” غا بلاتي انا غانجاوبك آ بنتي و غانجاوب گاع لي فحالك ! ماتبزابيش !

مؤخرا كلشي شاف فيديو القايدة لي منعات واحد السيد انه يطلق القرآن بالجهد و يصدع عباد الله ! و طبعا الخوانجية و اللحايا و حتى بعض المنافقين لي كاتجيهم مرا مرا ديك الحمية د الجاهلية ناضو كايغوتو و يسبو فالقايدة ! و حيت ” قايدة” ماشي “قايد” حسو بحگرة مضوبلة و عطاوها لادوز مضوبلة!  و آراااك للسبان من السمطة للتحت و للتكفير و للاحتقار و الاهانة !

بنادم ماباغيش يفهم انه كاينة شي حاجة  فوق من “التدين” و المظاهر ديالو و فوق من المعتقد ديالك اييييه آ سيموحمد فوق هادشي كلو ! كاين الانسان! كاين المواطن و راحتو و حقوقو راه حنا فدولة ماشي فزريبة لي رشقات يدير شي حاجة يديرها ! مايمكنش ليك آ سيموحمد تطلق ليا القرآن عند راسي بالباف و تآذيني بالصوت العالي حيت نتا يصحابك لاطلقتيه غاتبطل السحور و لا لاطلقتيه غاتحارب كورونا ! راه من غير المعقول تفرض على عباد الله يسمعو معاك للقرآن غي حيت “قرآن” و تتخبا مورا الهالة الدينية ديالو و القداسة ديالو باش تفرض الديكتاتورية ديالك و لي قالك لا مابغيتش نسمع تكفرو و تزندقو و تسبو ! واش ماشي الارهاب هذا ؟! طبعا هذا هوا الارهاب !

و دوك لي خارجين كايبكيو كي الهجالات ” واش القرآن ولاجريمة؟ ” ” واش حنا فدولة اسلامية؟” “علاش ماكاتغوتوش على مالين العراسات لي كايخليونا سهرانين تال الجوج د الصباح” ! آ باراكا من المزايدات الخاوية و التحبقين ! علامن كاتبوهلو ؟! القرآن ماشي جريمة و لكن القرآن فالباف مطلوق كايسمعوه عباد الله و كايصدعهم و يآذيهم جريمة و مت جريمة و بلا داك النفاق ديال لا انا القرآن على قلبي كي السمن مع العسل واخا نسمعو بخمسالاف ديسيبيل غايبقا زوين و عاجبني ! لا ا سيدي القرآن سمعو فدارك القياس لي غاتسمعو غا بوحدك و تدبر فيه و قراه و تمعنو و ديك الساعة ماغايدق عليك حد ! وواش حنا فدولة اسلامية ؟عاوتاني هاد الجملة لي كاتفرعو لينا بيها مخنا فاش كانبغيو ناقشو معاكم شي حاجة ! خصوصا فاش كاندخلو معاكم فالهضرة على الحريات و الحقوق و كاتخرجو لينا هاد الجملة الجاهزة فحال شي شاوارما مزيتة باش يحبس النقاش ! ايوا لااااا يا سيدي حنا ماشي دولة اسلامية حنا دولة ” دين الرسمي ديالها هوا الاسلام” سير قرا الدستور و لكن هادشي ماكايمنع انه كاينين فيها ديانات اخرى و معتقدات اخرى عايشة و تتمتع بالمواطنة الكاملة ديالها ! و سيدنا راه قال فالخطاب ديالو بلي هوا أمير المؤمنين لجميع الديانات واش فهمتي و لا لا ؟! ثم آجي لهنا ! واش ماحشمتيش تجبد هاد الجملة ديال “حنا دولة اسلامية” غا فاش كاتكون باغي تفسر زعما الرفض ديالك للحريات و الحقوق و المساواة و لا فاش كاتكون باغي تفرض شي ممارسات و طقوس قروسطية ! لا قلنا ليكم ماتصليوش فالزنقة و تبلوكيو عباد الله لي باغا تمشي لخداميها! فاش كانقولو ليكم ماطلقوش القرآن بالحهد و سمعوه غا فديوركم ! فاش كانغوتو على اهمية الحقوق و الحريات ! فاش كانقولو ليكم ماتسلخوش المثليين فالزنقة ! علاش هاد الاصرار بربط مفهوم “الدولة الاسلامية” بالممارسات اللاحضارية و التخلف و الاقصاء و نبذ الحريات ؟!

و بالنسبة لموضوع العراسات ! لي كايديرونجيه شي عرس راه يقدر يمشي يشكي بيه ! و فاش الجيران كايسمحو بالعراسات فالدروبة و الزناقي المغربية راه داكشي غالبا كايدخل فاطار التنازلات الاجتماعية ! مرة نتا عندك عرس غاتصدعني بالشيخات ! مرا انا عندي سبوع غانصدع بالمسمعين ! مرا لاخور غايموت غايصدعونا ولادو بصوت السديس فالباف و هادشي كايكون مرة مرة … و طبعا القانون كايكفل لأي متضرر أنه يشكي!

وفحال القرآن فحال الليدزيبلين لاطلقتيهم بالجهد و صدعتي بيهم عباد الله راه من حق القايدة تجي تحيد ديك “داكشي”!

موضوعات أخرى

03/06/2020 15:36

أقريو كتتهم سيناريست “شهادة ميلاد” بسرقة قصة “ياقوت وعنبر”.. ومدير شركة “ديسكونيكتد” ل”كود”: حطينا شكاية لبارح فالمركز السينمائي وفالغالب السيناريست دالمسلسل ماكاينش أصلا