سهام البارودي كود//

قالَيك آ سيدي المدونة كاتشكل تهديد للأسرة المغربية وغاتسبب العزوف عن الزواج ، آسيدي من عندي أنا الله ينعل بوها أسرة هادي لي كاتبنى على الظلم د المراة! غا عزفو على الزواج وزيدو عزفو! حيت لاكانت غا هاد الأسرة لي بغيتو نتوما، لي مبنية على الظلم والمعاناة ديال العيالات! مناقص منها.

لا كانت هاد المدونة غاتخلي بنادم يفكر مزيان قبل مايتجوج ويجيب شي بنت الناس يتكرفص عليها، راه داكشي لي بغينا وًلا كانت غاتخلع الحگارة والمرضى والحمّاق لي باغين يجيبو العيالات ويتكرفصو عليهم راه داكشي لي بغينا.

الأسرة خاصها تبنى على المساواة والاحترام، خاص الدري يكبر يشوف مّو مرتاحة، معززة مكرمة عندها حقوقها كاملة، ماشي  يكبر مع أم عايشة مع الراجل غا بزز، غا حيت ماعندهاش البديل، عارفة لا طلقات غاتلاح للزنقة هي وولادها وماغاتصور منّو والو، نهار كايضارب معاها كايتهدد عليها “نطلّقك ونجيب لالّاك”.

خاص تكون المراة عندها الاختيار واش تبقى ولا تمشي وتختار تبقى معاك يا هاد بوقال، واش دابا نتا راجل ترضى على راسك أنه المراة ماجامعك معاها لا حب لا عاطفة لا ميول لا جنس مگود وجالسة معاك غا بزز حيت حاصلة؟ هل ترضاها لنفسك؟ يا لّي ماعندو نفس! معلوم نتا عندك هانية ترضاها لراسك.

إيوا مرحبا بيكم ف2024، وقت حقوق المرأة جات، وآن الأوان أنه الأسرة المغربية تبنى على الوضوح والمساواة والاحترام باش تنتج لينا مواطنين أسوياء نفسيا ماشي هاد الأجيال ديال الحمّاق والمرضى النفسيين لي كايتقيّاو علينا فالكومونطيرات.