گود سبور//

تقصاو أولمبيك آسفي من كأس الكونفدرالية الإفريقية، وما قدروش يتأهلو للفينال بعدما تصيدو بتعادل إيجابي اليوم الاحد مع اتحاد العاصمة الجزائري فروتور الدومي فينال فتيران المسيرة الخضرا فاسفي.

وسالا الماتش بين أولمبيك آسفي واتحاد العاصمة بالتعادل الإيجابي واحد لواحد، وماركاو اتحاد العاصمة هما الأولين من بينالتي مع نهاية الشوط الأول، قبل ما يماركيو أولمبيك آسفي التعادل بواسطة موسى كوني فالدقيقة 75.

الماتش ديال اليوم بين أن أولمبيك آسفي ما عندهمش خبرة فالمسابقات الإفريقية، واللاعبين ديالهم كان عندهم سوء تدبير لأطوار اللعب وسذاجة فالتعامل مع اللاعبين الجزائريين اللي كانو كايطيحوهم فالبروفوكازيون تضياع الوقت، لدرجة ،ن لاعبين اسفي هما اللي ولاو بريوسهم كايضيعو بحال واحد الكورة فالشوط الثاني بقى واقف اللعب فيها مدة طويلة وكايحتجو على الحكم باش يرجع للفار وهو كايقولهم بلي ما كاينش بينالتي رجعو تلعبو ووالو بقاو شادين فيه والوقت كايضيع والريتم كايطيح وفاللخر رجعو كملو اللعب.

للإشارة فالماتش تعطل بشي ساعة على الموعد ديالو، حيث جمهور اتحاد العاصمة الجزائري هبط دار الشغب فالتيران واستفز جمهور أولمبيك آسفي، اللي هبطو منهم شي وحدين بعدما حسو بالاستفزاز، قبل تدخل الأمن اللي فرق الجوقة وحال دون تطور استفزازات وشغب الجمهور الجزائري لشي حاجة خايبة، وبالمقابل اسفر الحادث عن إصابات وسط المصورين الصحافيين اللي تضرب منهم واحد فراسو وخيط وتنقل للسبيطار باش يتعالج، ومن شي حوايج تهرسو بحال الكراسى والماطيريال د المصورين، وفسيناريو كايشبه لشغب السنغاليين ففينال كأس أفريقيا فتيران مولاي عبد الله، وهذا الشي كايبين أن أمور بحال هادي مدبرة وفيها يد الكابرانات د الجزائر، وأن هادو اللي جاو يشجعو اتحاد العاصمة ماشي جمهور وأغلبه بلطجية ديال الكابرانات مسخرين يديرو الفوضى فالتيرانات المغربية، مع العلم أن السلطات المغربية وفرت لهم النقل فابور من كازا حتى لآسفي، وحتى التيكيات فابور باش يدخلو للتيران.

نتيجة الماتش أهلت اتحاد العاصمة الجزائري لنهائي كاس الكونفيدرالية، بامتياز التسجيل خارج الملعب، حيث ماتش الذهاب فالجزائر سالا بالتعادل السلبي زيرو لزيرو، وأولمبيك آسفي ودعو المسابقة من الدومي فينال فأول مشاركة لهم فبطولة أفريقيا فتاريخهم.