محمد سقراط-كود///
مؤثر مغربي مثلي سميتو آدم بنشقرون كيدير كيدير محتوى ثقافي في الانترنيت، مشا للسعودية ومن بعد ماشفنا الفيديو ديال عائلتو كتودعو بالدموع والحب، دازت شوية دالوقت خرج ليه فيديو في علاقة جنسية مع صاحبو سعودي، سيكستايپ بحال لي تسرب لكيم كاردشيان وباريس هيلتون وراهم مشهورات ودارو الملايير من هادشي، وتاواحد في ميريكان ماعتبرهم شوهوا بالبلاد، إلا حنا في المغرب ناضوا الصفحات والمؤثرين لخريين لي باقي ماتسربوش ليهم الفيديوات وعتبروا بلي آدم شوه بالمغاربة، شوف هلى نكح المنطق كي داير، واحد كيدير علاقة جنسية مثلية شوه بربعين مليون بمثقفيها ومسؤوليها وكفارها ومؤمنيها.
دابا آدم بنشقرون لي دار علاقة مثلية مع واحد وصورها وما أذى حتى واحد مشوهش بالمغاربة كيما هاداك لي هز موس ديال الخضرة ومشا دار عملية إرهابية في إسرائيل ماشوهش بيهم او أي مغربي غتاصب او قنل او دار شي جريمة في بلاد خرى خارج المغرب ماشوهش بينا، هادوا افراد تاخدوا قرارات فردية كتخصهم، علاش حنا كمغاربة غادي نعتابروهم شوهوا بينا او كيمثلونا، واش حنا مسيفطينهم سفراء معتمدين كيمثلوا البلاد، او مسيفطينهم في هيئة ديبلوماسية، مشاو راسهم دارو داكشي لي بغاو الله يسهل عليهم.
وزعمة واش ترمة واحد غادي تشوه بلاد على قدها بتاريخها بعراقتها بمستقبلها آش هاد العقلية، راه لي كيشوه بالمغرب هو لي كيمشي يحتج قبالة أهم مشروع وطني دارو المغرب وهو ميناء طنجة استنادا لإشاعة وكيخدم أعداء البلاد ومن يريدون بيها سوءا، لي كيشوه بالمغرب هو هاداك لي كيخلي بلادو وعائلتو ومستقبلو وخدمتو وكيمشي يتفرگع في بلاد خرى ويقتل ناس عمرهم آذاوه، لي كيشوه بالمغرب هوما مسؤولين فاسدين تداروا على رأس مشاريع كانت غادي تزيد بالبلاد القدام ولكن للأسف بسباب الفساد تجهضات وماكانت عندها حتى نتيجة، لي كيشوه بالمغرب هو لي كيضل مقابل العيالات واش خاص ياكلوا ويشربوا وشنو يلبسوا وحتى لين يقراو او ميقراوش كاع.
