كود سبور//

باغي يبقى الدولي المغرب أدم ازنو مع بايرن ميونخ الألماني، على الأقل في ما تبقى من هذا الموسم الرياضي، وما باغيش يمشي إعارة لمدة 6 أشهر خلال الميركاتو الشتوي المقبل.

وهضر آدم أزنو وقال فحوار مع جريدة “بيلد سبور” الألمانية: “ما بغيتش نمشي إعارة فهاد الوقت، الإعارة لمدة 6 شهور ما شي الخيار المناسب ليا، وممكن نواجه هذا المشكل الصيف الجاي، وهذا الشي يعتمد على كيفاش غاتدوز الأشهر القليلة المقبلة حتى نهاية الموسم وشنو هي الحاجة المناسبة ليا باش نتطور”.

وكمل النجم المغربي الشاب: “عام 2024 كان مزيان بزاف بالنسبة ليا، وقدرت نحقق فيه قفزة كبيرة ولعبت أول ماتش فبطولة ألمانيا ولعبت أول ماتش مع المنتخب المغربي الأول، وحققت گاع الأهداف ديالي فهاد العام”.

وبخصوص الأجواء داخل المنتخب المغربي، قال أدم أزنو: “عاونوني بزاف صحابي فالمنتخب المغربي بحال ابراهيم دياز وأشرف حكيمي، وحكيمي ولى بحال خويا دابا، عاونوني نصبر وعطاوني راحة البال اللي يحتاجها أي لاعب شاب فالخطوات ديالو الأولى فالكورة”.