محمد سقراط-كود///
واش الرجل المغربي البالغ العاقل الزوج و الأب والأخ غير مكتمل النمو العقلي؟. حيت في كل فضيحة جنسية كيديرها هاد الرجل الرأي العام كيلوم الضحية هي اللولة، وبعض المرات حتى في جرائم البيدوفيليا كتلقى شي واحد كاتب واشدو ولادكم عندكم، واخا هو في الغالب الإعتدائات على الأطفال نسبة كبيرة منها كتكون داخل الأسرة، ولكن عموما الضحية كيتلام واخا يكون طفل، هادشي لي واقع مع المدير ديال مدرسة عين الشقف لي صوراتو تلميذة ضحية ديالو لسنوات من الإعتدائات الجنسية، وقبل ماتصور كون قالت راه تحرش بيها راه دغية يقلبوها عليها وتولي مطرودة من المدرسة وحياتها مدمرة وغير كذابة، جاب الله هاد البنت طلعات ذكية وزكات ليه حتى صوراتو وهاهو كتقلب عليه النيابة العامة، وعالله ياخد شي حكم طويل لأنه كان كيستغل السلطة ديالو في الإعتداء جنسيا على تلميذات.
آخر وحدة يمكن تتلام في قضية مدير مدرسة عين الشقف هي الضحية واخا تكون بخاطرها كتبقى تمليذة، والمدير لي من المفروض أنه مربي وكان عضو تيار إسلامي كون مكانش مجرم مغتصب حكار فراه المفروض مايشوفش في بنت كتقرا فالثانوية شوفة جنسية نهائيا، واخا تكون هي لي جات ريطاتو وقاتليه هيت لك، كان خاصو يقوليها بحال لي قال سيدنا يوسف لإمرة العزيز” ما عاد الله إنه ربي أحسن مثواي”، مايمكنش نتا راجل بالغ عاقل وتريطك تلميذة أو حتى تدير علاقة مع تلميذة، راه في جميع الظروف هاديك جريمة ويعاقب عليها القانون، مايمكنش تتحرش وتعتدي جنسيا على أي واحد في مكان العمل، راه هاداك المدير مادايرش غير جريمة وحدة راه داير مجموعة جرائم ويستاهل يتحاكم بالإتجار في البشر.
مدير مؤسسة تعليمية في مقر العمل خاصو يتعاقب بأشد العقوبات في حالة تحرش أو اعتدى جنسيا أو اغتاصب قاصر أو بالغ، وحتى الى مارس الجنس ولو بالتراضي كيبقى هاداك مكان عمل، ولكن باش يتم الدفاع عليه ولوم الضحية، والمعتدي راجل كبير بعقلو مدير مؤسسة تعليمية، فهادي إشارة على خلل كبير في المجتمع خاصو قرون ربما باش تعالج البلاد منو، الضحية مكتلامش.
