كود سبور//

هشام أيت منا، رئيس شباب المحمدية مبورض هاد الليامات على سعيد الناصري، رئيس الوداد البيضاوي والعصبة الاحترافية لكرة القدم، وحتى على عبد السلام بلقشور، الناطق الرسمي ديال هاد العصبة.

فمن بعدما حضر أيت منا لاجتماع
المكتب المديري ديال الجامعة نهار الأحد، اللي فات وسط استغراب الجميع، لحقاش ما عندو حتى صفة، عاود أيت منا حضر لمراسيم عملية سحب قرعة البطولة بقسميها الأول والثاني وكأس العرش، وأكثر من ذلك استضفاتو قناة الرياضية فالبلاطو، وتكلم على القرعة بصفته رئيس شباب المحمدية لا غير.

السؤال المطروح واللي حير الجميع ٱش كان كيدير أيت منا تما فالبلاطو، وشكون اللي سمح ليه يحضر الاجتماع ويعطي تصريح، واش مدير قناة الرياضية كان على علم بخرق البروتوكول وبرنامج جدول الأعمال، طالما أن تصريح هاد المسير لم يكن مبرمجا من قبل.

وثانيا علاش الناصري ما حضرش بصفتو رئيس العصبة الاحترافية، والمفترض أن يسهر بنفسه على عملية إجراء البرمجة، ثم علاش بلقشور، الناطق الرسمي ما ظهرش فالتلفزيون باش هو اللي يعطي تصريح.

ويبدو أن قوة ايت منا ونفوذه بدات كتجاوز الناصري وربما كيخطط باش يطيرلو بالبلاصة ويرجع هو رئيس العصبة الاحترافية، خصوصا بعدما اثبت الناصري فشله الذريع في تسيير هاد الجهاز.

باختصار حضور ايت منا لاجتماع المكتب المديري للجامعة والقرعة غير قانوني ويقدر يفتح باب تأويلات ما شي فمصلحة الجامعة والعصبة الاحترافية، خاص كل واحد يحترم موقعو واختصاصاتو باش تزيد الكرة القدام، كما هو مخطط له.