نجوى المالحي-كود//

من بعد شهرين ديال التزام الصمت. قررات اليوتوبوز المغربية سارة جو المعروفة باسم Realsarajo ولي مستقرة في ميريكان تخرج للاعلام وتدوي على قضية تعرضها لشلل نصفي في وجهها بعدما مشات لكوريا برجليها باش دير اشهار لواحد الكلينيك.

الأمور كانت عادية وبيخير وكيفما اتافقات مع الكلينيك دارت الاشهار ودوات عليهم زوين، لكن بعد مدة ملي دارت حصة علاج طبيعي وإبر صينية “acupuncture” في العمود الفقري وقعات الواقعة، ومابقاتش قادرة تحرك نص وجهها وملي كتسد يديها مبقاتش كتقدر تتحكم بيها.

سارة لي عندها مليون متابع في اليوتوب ونص مليون تقريبا في انستكَرام، قالت أنها ملي حاولات تحل الموضوع حبيا مع المسؤولين تعرضات للتهديد مباشرة، ودابا ولات خايفة على حياتها.

وخرجات اليوتوبوز في برنامج على قناة “العربية” وكشفات فيه التفاصيل كاملة.