كود العيون ///

قدمت وزارة الخارجية البوروندية معطيات حول اغلاق قنصليتها فالعيون بالاضافة الى سفارتها فالبرازيل وكندا.

فقضية قنصلية العيون قدمات وزارة الخارجية معطى مهم. قالت باللي سفارتهم فالرباط غادية تبقى مفتوجة وعملية ولكن فالمقابل كتسنى المغرب يفتح سفارتو فبوجومبورا عاصمة الدولة وتكون معاها اقامة.

هاد الشي كيعني ان هاد الدولة سدات قنصليتها فالصحرا بسباب وعود عطاها وزير خارجيتنا بوريطة نهار جا وزير خارجيتهم وافتاتحها معاه٬ ولكن ما وفاش بهاد الوعود. بوريطة طالق دبانو الالكتروني يشكر فيه ويقول ليه انت واعر٬ فين عاد لوعورية. ما وفاش بالتزامو مع دولة وكان الثمن هاد الاغلاق. عارفيين باللي هاد القنصليات عندهم رمزية مهمة بزاف للصحرا. كيفاش يوعد بسفارة للمغرب فهاد البلد الافريقي ويتعطل هاد الوقت كولو فالوفاء بالوعد.

راه اجهزة كثيرة خدمات باش تفتح الدول قنصلياتها فالعيون والداخلة. ضربتي خدمتهم فالزيرو.

وقالت وزارة الخارجية البوروندية ان سفارة بوروندي فواشنطن غادية دير خدمة سفارتي كندا والبرازيل اي ان السفارتين غاديات يبقاو مفتوحين ديبلوماسيا.