كود الرباط//

ملف المغاربة العالقين بالخارج اللي عرف انتقادات كبيرة لوزير الخارجية بوريطة في تدبيره بالشكل اللازم و المسؤول، و زيد عليه الشكايات الكبيرة جدا ديال المغاربة العالقين بالخارج و حجم الفضايح لي عاناو و كيعانيو منها يوميا مع القنصليات ديالنا فهاد البلدان.

بوريطة لي خلى لهب العالقين بيد القناصلة والسفراء، منهم لي دارو خدمتهم ومنهم لي ولاو فضيحة بشكايات وفيديوهات وتسجيلات كاتهمهم بالتلاعب باللوائح ديال العائدين وهادشي طرحوه البرلمانيين مؤخرا.

بعض القنصليات لي خدمو، حسب شهادات المغاربة لي حاصلين فكندا ، بلاد بحجم قارة و لي فيها ما يقارب 600 مغربية و مغربي حاصل و باغي يجي بحالو … و خصوصا أن كندا فيها قنصلية وحدة و كاينة فمونريال..

“كود” ربطت لاتصال بعدد من المغاربة لي حاصلين فكندا، لي اغلبيتهم كيشكرو القنصل العام فؤاد قدميري و النائب ديالو سعيد العلام لي كيصفوه بولد و الكفاءة الوطنية الكبيرة .

والغريب أن اغلب هاد المغاربة لي حاصلين فكندا كيعاودوا نفس الاسم “السي العلام الله دار معانا مزيان وقف معانا”.

وصفي بوعزاتي فاعل سياسي ومدني و أحد نشطاء مواقع التواصل الاجتماعية و لي حتى هو حاصل فاوطاوا العاصمة الكندية، قال ل”كود” :”القنصل العام رجل تواصل بامتياز بمعية نوابه لي سهروا بشكل مباشر على حل مشاكل المغاربة العالقين بكندا و السي العلام كيبقى هو الجوكير الكبير ديال القنصلية المغربية بمونتريال”.