كود سعيد الشاوي //

صگوعية هي عند حزب العدالة والتنمية. قبل ما يبهلدوه لمغاربة هاد التبهديلة ويجريو عليه تقريبا من الحياة السياسية فانتخابات البارح ثامن شتنبر 2021 كانت عندو فرصة يفلت منها.

هادي مدة مصطفى الرميد وزير الدولة القيادي المستقيل حاليا من الحزب اقتارح عليهم فكرة التقليص الذاتي خلال انتخابات البارح. اي يقدمو مرشحين قلال باش يوقع التناوب. قدم الفكرة اللي فيها يتفتح اولا النقاش داخليا ثم يتخذ القرار بعدها٬ لكن فكرتو ترفضات.

تقلق بنعرفة وقال ليه علاش غير لحوايج الخايبة هي اللي خاصها تجي للحزب فالوقت اللي كنكون فيه امين عام. كان نظرو قصير هاد بنعرفة كيف ديما. شاف كلشي الا هاد التگرگيعة اللي كلاها البارح

ناض نقاش قصير وتسد فهاد الموضوع. الرميد خدا مسافة مع قيادة بنعرفة اللي كان سباب فوصولو لرئاسة الحكومة٬ وخلاهم ماشيين للحيط. الضربة كانت كبيرة. الصدمة كانت قاسية. تسونامي قلعهم من الحياة السياسية. سبابو غباءهم وتعجرفهم.

كون سمعو منو كون حفظو شوية كرامتهم السياسية