كود هناء ابو علي ///
البارح فالليل خرجات علينا وزارة الصحة ببيان غبي. وزارة ايت الطالب دارت بيان ماشي غير غبي ولكن ما عند بوه ساس من راس. كانت خرجات اخيرا كتهدر باللي المغرب فمنأى على هاد الطفرات ديال كورونا فيروس.
اش وقع حتى البارح دارت بيان كتقول فيه للمغاربة يحتاطو من “ظهور طفرات جديدة لفيروس كورونا. البيان هدر على اكتشاف مختبراتنا ل 21 متحور جديد من السلالة الانگليزية ديال هاد الفيروس.
واخا قالت باللي لحد الان ما عندنا حتى شي متحور جنوب افريقي ولكن البيان فيه تحذير غير مفهوم. قالت باللي مازال ما وصلناش للمناعة الجماعية وخاصنا تمثاتلو لتدابير الوقائية: نلبسو لكمامة بطريقة صحيحة ونحتارمو التباعد ونخليو بينا وبين الاخر ميترو ونغسلو يدينا.
الوزارة كتناقض فهاد البيان مع معطيات كتنشرها يوميا على الحالة الوبائية. هاد الحالة مزيانة وبزاف فالمغرب. مثلا البارح السبت يالله تقاسو 444 مغربي بكورونا وعندنا معدل اصابة فيه 1.2 لكل 100 الف نسمة فداك اليوم ووصلنا لمؤشر اصابة تراكمي فيه 1323.1 لكل 100 الف نسمة. نسب مزيانة بزاف بزاف مقارنة بارقام عندنا نيت قبل اسابيع. بلا ما ندخلو فمقارنات مع اوربا.
كورونا ما بقاتش كتقتل بزاف. البارح ماتو 8 ودول فاوربا كيتقتل فيهم العشرات يوميا. الفيروس ما عندوش نسبة طالعة فالاماتة. يالله وصل عندنا 1.8 بالمائة فنسبة اماتة.
نقطة اخرى من احصائيات البارح كتبين باللي امورنا مزيانة وهي عدد الحالات الخطيرة. عندنا يالله 33 تحت التنفس الاصطناعي الاختراقي والبارح 37 حالة تدهورات صحتهم.
يعني كاع ارقام كتعطيهم وزارة الصحة عن الحالة الوبائية يوميا راها فالخضر ولكن بيانها البارح اور جوه. حقاش دارنا فالاحمر.
تناقض غريب فنفس الوزارة. تناقض كيبين غرابة هاد ايت الطالب اللي عطاوه وزارة الصحة وهدرو قبل تعيينو على تعيينات الكفاءة. الساعة طلع كلشي الا كفء
