أخنوش مواصل جلسات الحوار الاجتماعي مع النقابات بلقاء جمعو مع وفد الـ “كدش”
كود هناء ابو علي ///
هاد ايت الطالب وزير الصحة حالف على لمغاربة. كلشي قراراتو فيها مشاكل كثيرة حقاش ما كيشرح والو. ما كيوضح والو. كانت الطريقة الكارثية اللي قدم بيها اجبارية التلقيح ثم قضية الجرعة الثالثة ثم فرض الباسبور ڤاكسينال…
دابا جات قضية تعليق رحلات مع المغرب من والى المانيا وبريطانيا وهولندا من هاد الليلة. لاحظو حتى الوقت ما عطاوهش. قبل كانو عطاو وقت اطول باش الناس يوجدو ريوسهم. هاد القرار من غير انو كارثي على السياحة اللي اصلا مقتولة٬ كانت طريقة تدبيرو غبية بزاف.
فعلاقة بالسياحة٬ وزارة الصحة اللي هي عضو فلجنة مشتركة كانت دارت لائحة “أ” ولائحة “باء” للدول اللي تدخل المغرب. اللولى يدخلو الناس اللي جايين منها بالباسبور سانيتير ويعمرو ورقة وصافي والثانية اي باء” زايدين عليهم اجبارية “بي سي ار” ديال 48 ساعة.
المشكلة ان موقع وزارة ايت الطالب الرسمي كتقول باللي اللائحة “باء” اللي فيها خطر طالع بخصوص نقل فيروس كورونا تم تحيينها من قبل اللجنة الوزارية المشتركة يوم 11 يوليوز ودخلت حيز التطبيق مع لحداش و59 دقيقة من ليلة 13 يوليوز. الوزارة كتقول باللي كيدار اجتماع اسبوعي “تجتمع هذه اللجنة كل أسبوع وكلما اقتضت الحالة الوبائية ذلك، من اجل التتبع وتحيين البرتوكول الصحي”.
طبعا الوضعية الوبائية لبلادنا وللبلدان المعنية بهاد اللائحة “باء” تغيرات بزاف. شي تحسنات بزاف وشي تكرفصات ومع ذلك هاد اللجنة للي فيها وزارات “الخارجية” و”الداخلية” و”الصحة” و”السياحة” ما عمرهم تجمعو.
3 اشهر دازت ومازال ما غيرو والو. ما زادو حتى دولة على 88 دولة اللي كاينة فاللائحة باء ولا نقصو من هاد اللائحة.
مثال بسيط على الاستهثار لكبير لهاد اللجنة. لوزارة الصحة. بقى ليكم غير قرارات اخرى.