الكابرانات خسرو ماتش جديد مع المغرب: الكاف حكم بخسارة USMA مع بركان بسبب الحجز على تونيات الفريق المغربي
سهام البارودي – كود//
شوفو ! راه القضية ماعندها علاقة لا بهوية لا بتاخرية حيت الهوية ديال المغاربة كاينة فالدارجة لي كايتكلمو بيها و محافظين عليها ! القضية ديال اللغة فالمغرب من ديما عندها علاقة بالمصلحة السياسية ! و اغلب لي كايدافعو على التعليم بالعربية اليوم كايدافعو من منطق مصلحة سياسية ! الخوانجية و دوك بقايا اليسار كايلعبو ب”الدفاع على العربية” باش يربحو الاصوات فالانتخابات على ظهر شعيبة ! و تمشي نتا يا شعيبة تقري ولدك العلوم بالعربيةو يمشيو هوما يقريو ولادهم بالفرنسية و لونگلي ! و فاللخر تلقا راسك يا شعيبة راس مالك غا العربية ماقاد تخدم بيها ! ماقاد تقرا بيها ! ماقاد تهاجر بيها ! و تجلس على الصبع الوسطاني.
لا حقا ! ” لغة المستعمر” ايه و من بعد ؟ علاش العربية فحد ذاتها ماشي لغة ” المستعمر” ياك المغاربة كانو كايهضرو بالامازيغية قبل مايهجمو عليهم العرب ؟ و قبل الامازيغية شنو كان ؟ سير قرا التاريخ باش تعرف بلي ماكايناش شي حاجة سميتها ” المستعمر” اصلا ! كاينة اللغة و صافي ! و اللغة وسيلة للتواصل خاضعة لتغيرات الزمن و المكان! و اليوم المغاربة كايتواصلو بالدارجة و الامازيغية و الفرنسية و الاسبانية و الحسانية حيت المغرب ماشي هوا افغانستان و لا السعودية يا بالمكلخ ! المغرب راها بلاد دازو منها بزاف ديال الحضارات و اللغة ديالها واخدة من گاع هاد الحضارات.
ثم يا بالحمار ! فرانسا اليوم ماشي ” مستعمر ” تا مال طاسيلتك عايش فالماضي ؟! دير ليك شي ميزاجور و عيش فالحاضر ! حيت فرانسا اليوم اول شريك اقتصادي للمملكة كانروجو معاها ملايير الاورويات كل عام بين الاستيراد و التصدير ! و عندنا معاها علاقات اقتصادية قوية.
فرانسا هي اول مستثمر فالمغرب و وزينات رونو فطنجة و بوجو فالقنيطرة و عرام ديال الشركات الفرنسية حالة عندنا و مخدمة المغاربة و بفضلها أسر عايشة و ناس مكبرين ولادهم ! و بفضل هاد الاستثمارات ديال فرانسا كايجيو استثمارات اخرى من دول اخرى و كايتغنى مناخ الاعمال فالمغرب.
و نزيدك ! فرانسا اليوم هازة عدد كبير من الجالية المغربية لي عايشة فالمهجر ! و كايسيفطو للمغرب جزء كبير من العملة الصعبة !
و نزيدك عاوتاني ! اول بلد كايجيو منها السياح للمغرب !
و نزيدم عاوتاني ! فرانسا راها بلاد الحضارة ! بلاد الأنوار ! حقوق الانسان ! البلاد لي فاش كايمرض شي مسؤول من هادو نيت لي ماباغينش ولاد المغاربة يقراو بالفرنسية ! كايجري يشد طيارة باش يمشي يداوا فيها ! ماكايمشيش عند خوتو فالسعودية و لا مصر و لا السودان لي كايهضرو بالعربية !
فرانسا لي غير كاتحسو براسكم غايقرقبو عليكم كاتجريو لسفاراتها و قنصلياتها تخباو فيهم !
و نزيدك ثاني ! الفرنسية اليوم هي لغة اغلب الدول الافريقية لي المغرب كايبني معاها علاقات اقتصادية و ديبلوماسية مهمة !
ايه نعام آس ! ديك الكونغو و الگابون و مالي لي كاضحك عليهم فاش كاتبغي زعما تستهزء من الفرنسية ! هادوك الدول اليوم المغرب كايتقاتل باش يدير بلاصتو معاهم و
يستثمر فيهم فمجالات البنوك و الاتصالات و الاشغال …
ايوا ؟ نحيدو حنا الفرنسية لي دايرة ليك قوقة و معامن غانتعاملو ؟ فين غانستثمرو ؟ باش غاتهضرو مع المستثمرين و السياح و باش غانروجو الفلوس ؟ غاتعيط على خوتك من السودان يعتقونا ؟
ها علاش خاص الفرنسية تكون و تبقا ! و يتقراو بيها العلوم اليوم ! في انتظار انه الانجليزية تاخد حيز اكبر فالتعليم المغربي، و يكون المغربي ديال غدا مواطن قاد يتكلم جوج لغات مهمة بالاضافة للدارجة ديالنا و لي هوما الفرنسية و الانجليزية على حد سواء.
راه ماكاينش شي خرج على المغاربة فقضية اللغة قد هاد الحسابات السياسية و دوك الحياحة ديال الخوانجية و الاستقلايين قبل منهم ! نهار اللغة تحسم ببرغماتية و تراعي المصلحة الاقتصادية و التعليمية للمواطن ! تما فين غايكون الحل.