سهام البارودي كود ////

واخا فالأول فاش شفت “راقي” جالس جنبا لجنب مع طبيب و طبيب نفسي قلت مع راساتي سفوخس على زمن الرداءة لي ولات كاتساوي بين العلم والخرافة، ولكن بعد شوية ديال التفكير قلت مزيان ! فيها خير ! عندنا حوار مهم على ظاهرة ” الراگد” خصوصا مورا الفيديو ديال نعيمة دآزرو لي خلق ضجة يستحق نسمعو فيه الرأي ديال كلشي باش نعزلو الصالح من الطالح و الحق من الباطل! حوار فالتلفزة غانشوفو فيه رأي العلم و رأي الخرافة و أحسن حاجة هي نشوف رجال العلم الأطباء الأجلاء كايسلخو ليا فالخرافة و كايعطيو لباباها لعصا قدام ملايين المشاهدين ! باش نيت دوك العيالات المسكينات لي كايتيقو بالرقية وكايطيحو ضحايا ديال الدجل و النصب و الشارلاطانيزم يشوفو بعينيهم بلي داك الهضرة غير تخربيق و مامنها والو.

ولكن تصدمت من درجة التحبحيب و التمسكين والترهبين لي أبان عليها الأطباء(رجال العلم) فالبرنامج ! لي عوض مانعولو عليهم يقولو للراقي سطوب من التخربيق و سطوب من نشر الأساطير و يوقفوه عند حدو! جرهم لعندو و بقاو تابعينو ! آلاواه النبي وصى على الرقية ! آ لاواه الجن يمكن يحوي بنادم ! آلاواه بنادم يمكن يحمل من الجن !آلاواه العافية و الطين ماكايتلاقاوش ! يا ودي واش هذا نقاش و لا برنامج “صنعة بلادي”.

وتحول البرنامج من حوار نورمالمو الغرض منو يناقش حالة طبية و يعطي التفسير ديالها العلمي ! المنطقي لي يعاون الناس ففهم القصة من منظور علمي و يحيد عليهم ديك الغبارية ديال الجهل! لبرنامج كايناقش واش الرسول كان كايدير الرقية و لا لا ؟ و واش الجن يقدر يحوي و لا لا ؟ و واش المرا تقدر تحمل بجني ؟ واش الراجل لي بغا ينعس مع مرتو و ماذكرش اسم الله غاينيكها ليه جني فبلاصتو و لا لا ؟ مصيبة و صافي فحالا الرواسا و النگالزة و الجابون لي كاينعسو مع عيالاتهم بلا مايذكرو اسم الله كايولدو نيت الجنون !! وا راهم نيت جنون و لكن بمعنى آخر.

شوف آ سيموحمد ! باراكا من التفلية على الناس ! العلم علم و الخرافة خرافة و القرآن كتاب دين و روحانيات ماشي كتاب علوم وسدات مادام.
فايتين حضرتو لشي سبوع ديال شي جن و شي مرا ؟ لا

فايتين شفتو جن كاينيك مرا ؟ لا

داك الراقي براسو لاعندو دليل على وجود الجنون يمشي ياخد واحد الجائزة ديال مليون دولار عارضاها واحد المنظمة امريكية لأي واحد قادر يثبت وجود الأشباح، الجائزة سمتيها ” One million dollar paranormal challenge”
من 1964 و هي معروضة و حتى ل2015 السنة فين توقفات حتى واحد فالعالم كاااااامل ماقدر ياخدها ! يا الله آ سي الراقي لي متأكد بلي المرا تقدر تحمل من الجنون سير خود ليك داك مليون دولار وتبرع ليا مع راساتك،
ايوا يا الله آش كاتسنى ؟

لا مايمكنش ! و هاد الملايين ديال العيالات الجاهلات شكون غايستاغل الجهل ديالهم و اليأس و المرض ؟ شكون غايغمق عليهم بديك الهضرة ديال الرسول دار الرقية و الصحابة تاهوما ….!

أنا فرأيي الشخصي ، النبي غي خليوه فالتيقار و الصحابة خليوهم فالتيقار ! ناس كانو عايشين فالصحرا هادي قرون ماكايعرفو لا سكانير لا اونتي انفلاماطوار لا اونتي بيوتيك ! كايمرضو و كايقلبو يداويو راسهم بطرق بدائية فحال گاع الحضارات لي كانت داك الوقت و لي تاهوما عندهم تعويذات و أعشاب و أشياء طبيعية كانو كايتعاونو بيها على المرض و كايحاولو يفسرو الظواهر النفسية فحال الاكتئاب و التوحد و الرهاب على حساب فهمهم و داكشي لي قدو عليه و كايمتازج عندهم الواقع بالخرافة و الأسطورة ! و كاينين حضارات واعرين فين يبانو المسلمين فهادشي ديال التداوي بالأعشاب فحال الحضارة الصينية.

و لكن صافي سي فيني ! دابا عصر العلم هذا ! الظواهر الطبيعية و الطبية و النفسية عندها تفسيرات علمية و ناس خدامين عليها ! هدا عصر الأشعة الكهرومغناطيسية، عصر البوزون دوهيگز! عصر l’IRM و الليزر و الموجات الصوتية ! ماتجيوش تعمرو ليا راسي أنا بالخرايف ديال الجن !

واش هاد الجن العاشق مسطي بگاع الجهد لي عطاه الله و القدرات الخارقة لي عندو غايخلي ماريا شارابوفا فروسيا كي البيض مقشر و جينيفير لوبيز فهاواي و سيلينا گوميز فهوليود و هيفاء وهبي فبيروت و غاتحلا ليه النعسة غا مع التيبارية وسط شي براكة فثنين شتوكة و لا حنان بنت الفقيه بن صالح ؟ هاد الجن حمق مسخوط فيه شي دعوة غايخلي ملائكة فيكتوريا سيكريت ادريانا ليما و سارا سامبايو كي الحميمات بالسترينغات و السوتيامات و يجي يحمل خويديجة فالقنيطرة و لا فنعيمة فآزرو ! آزرو راه يقتلو فيها غا البرد و الثلج ؟

توما مال دينمكم كاتفلاو على الشعب و كايتستاغلو الجهل ديالو باش تخوروه فصحتو و ففلوسو اكثر ماهوا مخور؟

لاغادي تهضرو على الحالة ديال السيدة غاناقشوها بالعلم و كفى به نعمة ! العلم كايگول عندها حمل كاذب صافي الصلاة على النبي ، تمشي عند الطبيب ديال النسا و تبع عند طبيب نفسي حتى تتشافا ! و ماعند الراقي مايقول و حتى الشيخ و لا الفقيه ماعندو مايقول تاهوا فهادشي ! حياة الناس ماشي لعبة باش نرضيو فيها الخواطر ! راه فاش كايكون فيك الكونصير و كايقولك الطبيب خاصك تقطعي البزولة ! كاتقطعيها بوان فينال باش ماينتاشرش فيك الكونصير، كلمة الطبيب(العلم) هي الأولى و هي الأخيرة ! ماشي كانعيطو للراقي و نعيطو للشيخ و نعيطو للفقيه و نعيطو لمول الزريعة و الگلاسة د الحمام باش كل واحد يسطل بسطله في الموضوع و هذا يقوليك قطعي و هذا يقولك لا راه الجن لي ساكن فالبزولة و لاخور يقوليك لا السلف الصالح كانو غير كايعبزو البزازل ماكايقطعوهمش و العياذ بالله و نديرو استفتاء يتساوا فيه صوت الطبيب مع صوت الفقيه مع صوت الدجل فموضوع مهم العلم حسم فيه بشكل قطعي.

لا و الراقي مكسطر تاهوا نعام آ سيدي ! و كايخرج فعينيه ! و كايقولك ” تا الرقية طب” ! و عاجباه ديك ” باحث في شؤون الرقية الشرعية” لي قدماتو بيها المقدمة ديال البرنامج ! فين آ خويا كاتبحث فشؤون الرقية الشرعية؟ فهارفارد و لا اوكسفورد و لا جامعة الطب فمونبولي ؟ فين كاتبحث و شكون الدكتور لي كايأطرك و كايشرف على هاد لاطيز ديالك ؟ و فوقاش غاتناقش الرسالة ديالك باش نجي نحضر ليك ؟

راه حشومة هادشي، حشومة ماتكونش عندنا الشجاعة نقولو للموخربيق راه كاتخربق و تحت مسمى “حرية التعبير” و الرأي و الرأي الآخر نعطيو فرصة لأشباه العلماء و أشباه المحللين و أشباه المتدينين يحلو فامهم فوسائل الاعلام و يمررو الخرافة ديالهم لليائسين و الجاهلين و المرضى من ابناء الشعب ! شكون هوما هاد الرقاة لي ولاو كايتساواو بالاطباء حتى فالمنابر الاعلامية ؟ و تحت أي اطار قانوني كايخدمو؟ و تابعين لإينا وزارة ؟ الصحة و لا الصناعة التقليدية و لا المياه و الغابات؟ و اينا ضرائب كايخلصو للدولة ؟ باش يولي عندهم هاد السلطان و الجبروت كامل و من بعد ماسرحو كي الأخطبوطات فالأحياء الهامشية و الگاراجات نوليو تاهوما كانشوفوهم فالتلفزة كايفتيو و يعطيو الدوا و يكتبو لورضونونص للمرضى ! ؟ سي با بوسيبل !

الرقية قالك ! حيت الكوريين مالين السامسونغ ماكايخرجو السامسونغ گالاكسي ايس ويت للسوق تاكايرقيوه من العين و الحسد و التابعة ديال الآيفون و كايشلوه بالما ديال سبعة د الموجات و كايعلقو ليه كموسة عامرة بالشبة و الحرمل ! و ماكايحطوه يتباع تاكادفلو عليه الما المقري تف تف تف نتا فعار الله و النبي رسول الله آ السامسونغ آ وليدي من عين الآيفون و من عين الآشتيسي و الهواوي و الاوبو … تف تف تف !

ايوا باااااز ! و الله حتى باز !