كود الرباط احمد الطيب //

الحرب بين وزير الصحة خالد ايت الطالب، ومحمد اليوبي مدير مديرية الأوبئة، مسالاتش وباقي مستمرة، بعد عاصفة “الاستقالة” لي قدم اليوبي بسبب صراعه مع الوزير ومستشاريه.

اليوم حفيظ الزهري مستشار وزير الصحة، دار تدوينة كيدافع على الوزير وكيقلز فيها لليوبي من تحت الجلابة. دار تدوينة بلا ما يحتارم مهمتو كمستشار.

التصرف دلي دار الزهري مبرهش ما كيليقش بمسؤول التواصل بوزارة الصحة خصوصا وأنه سبق له أن نشر الفايك نيوز في صفحته وسبق له أن صرح لوسيلة اعلام وخالف الفصل 8 من الظهير الشريف لي كينظم أعضاء الحكومة وتأليف دواوينهم”.

هاد الزهري لي كان محسوب على إلياس العماري وكولشي كيعرف قصتو معه، ولي ولى محلل سياسي واخا مكيفهم فالسياسة تا حاجة بسبب تصرفاتو لي كتبينو أنه تا القانون مضبطوش، اليوم خرج كيحفر لمدير مديرية الأوبئة.

ماشي أول مرة دارها الزهري، راه كان ديما كيقلز ليه وكيضرب فيه، ولكن واش دبا هاد الوقيتة ديال هادشي لي كولشي المسؤولين فالدولة مكافحين باش نخرجو من هاد الجايحة بأقل الخسائر.

هاد مسؤول التواصل بان باللي شخصيتو مهزوزة. خواف. مسح دغيا تدوينة ديالو كيف كيدير شحال من مرة فاش كيخربها على راسو.

واش هادا وقت هاد الصراع وفين هاد الوزير

نفس المستشار كيسوق باللي اليوبي راه مع البي جي دي. واخا لنفرض انو منهم. اولا هو مدير. انت غير مستشار. هو ولد الدار. انت غير دايز.

دابا واش تكون فحزب كلشي عارف كيفاش تولد بحال البام وصلات بيك الوقاحة تسب حزب امينو العام هو رئيس الحكومة. واش هاد البي جي دي انقلابي.

اييه ما عندهاش مع توجهاتو المحافظة وكنحاربوها فكود. لكن الافكار ماشي الحزب.