سهام البارودي- كود//

الطالب المغربي العادي لي عندو مسار دراسي عادي بلا عثرات كاياخد الباك على تمنطاشرعام و الاجازة على واحد و عشرين و لابغا يزيد راه كاياخد الماستر على ثلاتة و عشرين ! يعني  ماتجي توصل لثلاتين عام من عمرك راه تسع سنين عندك تعرف فيها فين باغي تخدم و شنو باغي دير فحياتك ( هادشي لا كنتي فعلا مسالي قبك و ساينتي حتى الاجازة عاد تفكر فالمستقبل ديالك ) !
ثلاتين عام واحد السن لي نورمالمو الانسان كايكون طراسا فيه الطريق ديالو ! قرا و شد ديبلوماتو و خدم و عارف فين غادي ! واش باغي يخدم فالقطاع العام او الخاص ؟ واش باغي يبقا فالخدمة او يبدلها ؟ و ضرب واحد التسع سنين او سبع سنين فسوق الشغل ساهم فيها فصندوق التقاعد و الضمان الاجتماعي و خلص للدولة الضريبة على الدخل ! كلا و ووكّل ! هادشي العادي ! النورمال فالعالم كامل تقريبا ! انا مثلا ثلاتين عام لقاتني شادة الماستر و عندي عمل قار و دخل قار و دار قارة !

هادشي علاش جاني عادي جدا القرار ديال تحديد سن ثلاتين سنة كأقصى سن يمكن يتقدم بيه الانسان للكونكور ديال التعليم ! لي ماشي عادي فهاد القضية هوا التولويل و البكا و النواح لي جا مورا هاد القرار و لي كايعبر على النظرة لي عند بزاف ديال الناس على قطاع التعليم كقطاع لتصريف البطالة ! بنادم كايدوز الكونكور د للبوليس و ماكاينجحش و كايدوز الفراملية و ماكاينجحش و الجدارمية و ماكاينجحش كايبقا يدور و يدردر و باغي تايسالي من الدوران ديالو و يضربوه الحيوط عاد يدفع للكونكور ديال التعليم فحالا التعليم شياطة ! التعليم قطاع ماعندو بواب غي دفع و دخل بسباطك ! و فنفس الوقت كايغوت على جودة التعليم ؟ علاه كيفاش بغيتي الجودة و نتا اصلا كاتعامل مع التعليم كا رويضة سوكور ؟

كاينة واحد النظرية سميتها نظرية الفوضى باختصار كاتقول بلي حدث بسيط فحال يمكن يطرا و ينتجوا عليه سلسلة احداث اكبر و اكبر! مثلا فراشة فالبرازيل حركات جناحها و طارت … هاد الحركة البسيطة ديال الفراشة يقدر ينتج عليها اعصار فميريكان ( بريف تقدرو تقلبو على هاد النظرية فگووگل ) ! هاد نظرية الفوضى عندها اسم آخر هوا ” تأثير الفراشة ” حنا فالمغرب عندنا واحد الحاجة سميتها ” نظرية الفرّاشة” بالشدة على الراء ! و هي ديك الحالة ديال التعاطف الاعوج لي كايدخلو فيها المغاربة فشي مواقف لا يصح فيها الا المنطق و القانون ! المنطق كايقول الفرّاشة فالزنقة كايحتلو الملك العمومي و يعرقلو السير و يوسخو الزنقة و المغاربة بالمقابل كايتعاطفو معاهم و اذا تشكيتي كاتسمع ” و فين بغيتيهم يمشيو ؟ واش غايخرجوا يگريسيو ؟” ! آ سيدي المنطق كايقول الاجازة كاتخاد على واحد و عشرين ثنين و عشرين سنة و التعليم الاجل الاقصى ديالو ثلاتين سنة آش بغيتي مازال ؟ ماتقولش ليا ” فين بغيتي يخدمو؟” حيت التعليم ماشي مؤسسة خيرية !

انا بعدا كانشوف بلي شرط ثلاتين عام راه الرب ديال بيخير حيت التعليم قطاع باغي الصغر و النشاط و العقل صغير و مازال طري ! باش تتفاهم مع الدراري و يكون راسك خفيف ! و هذا ماشي وقت الانسان يبقى متكّي تايدير ثلاتين عام عاد يمشي كايجري يدفع للتعليم ! عطا الله القطاعات و عطا الله الخدامي و عطا الله الكونكورات لبنادم لي باغي بصح يخدم و يضرب تامارا على راسو ! و هاد النظرة للتعليم راها فعلا مؤسفة ! و ماكاتبشرش بالخير