كود سعيد الشاوي كازا ////

كون كان سعيد الناصري كيحشم وكيحتارم الوداد البيضاوي وتاريخها الزوين كون البارح قدم استقالتو. البارح بعد الاقصاء ضد الاهلي المصري فنص عصبة الابطال الافريقية كان يخرج من الباب لكبير. سعيد الناصري ورط الوداد فحاجة غادية تبقى لاصقة فتاريخ هاد النادي العريق المجيد. سياسي بدون اقتناع من حزب موبوء اللي هو التراكتور واحد اتباع الياس العماري اللي كان باغي يخرج على لبلاد بحال حزبو جابوه فلحظة الحرب اللي كانت فيها الداخلية والدولة او جزء من الدولة باش نكونو اكثر دقة٬ بغاو يحاربو بغباء عبد الاله بنكيران. 

كلنا عاقلين على مسرحية “اكرم ارحل” وكيفاش تصيبات. 

الناصري جزء من التاريخ السياسي غير المشرف للمغاربة. التراكتور بغاو يدخلوه للكورة ونجحو فقضية الوداد٬ بغاو يدخلوه للاقتصاد بغاوه يدخلوه للفن للموسيقى للمجتمع المدني باش يهيمن بشكل كلي على السياسة فالمغرب. هاد السيناريو فشل باش صحاب الياس والناصري وغيرهم دارو مسرحية “اولاد زروال”. طبعا هاد ولد زروال راه زميل للناصري فالحزب وفالبرلمان. 

ربحهم بنكيران امين عام حزب العدالة والتنمية فانتخابات 2016 التشريعية وريب ليهم الحفلة. اييه من بعد دارو سيناريو اخر باش يبعدوه على تشكيل الحكومة وجابو خونة من حزب المصباح باش يطعنوه من الخلف. 

بقات الوداد من بقايا ديك المرحلة. فمغرب بلا ديك الحرب يستحيل يكون سعيد الناصري رئيسا للوداد. كاع الوداديين المجنونين بحب هاد النادي ما كيعرفوش عندو شي تاريخ لعشق الاحمر ولا فمكاتبو. 

دابا خاص الوداد يسترجعوها الوداديين. تبقى الوداد نادي هاز راسو. نادي فايام ادريس البصري ما قدروش يدخلوه للسياسة كيف دارو مع الراجا. بقى مستقل ايام الرئيس الشهير مكوار. 

دابا خاص مكوار المرحلة الحالية. من الشروط الاساسية يكون ناجح فحياتو فشي قطاع. ماشي ما معروفش اش كيدير. خاص يكون قاري مزيان وما عندوش سوابق اي نوع من السوابق. خاص الوداد تبدا بصفحة جديدة. 

ماشي مشكل تتنسى عامين او ثلاثة او اكثر باش تبني فرقة. غير هاد البناء غادي يكون على الصح. ماشي لبني الخاوي بحال هاد القضية ديال نجيبو ولد زيدان. الفرقة محتاجة للعابة كيفزگو التوني. لعابة بحال ايام النايبت والداودي وفخر الدين وبنعبيشة وابرامي …