كود كازا ///
واش حكيم زياش لاعب المنتخب المغربي ولاعب اجاكس امستردام الهولندي قرب يلعب للنادي الالماني الشهير بايرن ميونيخ؟
اللي اكيد ان النادي الالماني محتاج للعابة. هاد الشي قالو مدربهم نيكو كوفاتش، اللي قال باللي المجموعة الحالية ما كاملاش وخاص التعاقد مع لعابة جداد.
كوفاتش قال فمؤتمر صحافي قبل بداية البوندوسليگا اثناء تقديم الكرواتي ايفان بيريسيتش، اللي تسلفوه من الميلان: “راه مازال محتاجين للعابة. فرحان بايفان وهو اول واحد وصل. غير راه يمكن يتضرب وخاصنا نواجهو هاد الاحتمال. غاديين نحاولو نجيبو لعابة من هنا حتى 2 شتنبر” =موعد اغلاق الانتقالات الصيفية=
البايرن خسر فالسوبر ضد نادي دورتموند اللي كيلعب ليها لاعب المنتخب حكيمي. النادي البافاري مشاو ليه لعابة كثار منهم اريين روبن وفرانك ريبيري وخاميس رودريگيز٬ يعني بلاصة زياش موجودة.
دابا المفاوضات اش غادية توصل. زياش باغي يمشي باغي يبدل وهاد الشي فصالحو٬ والبايرن باغياه.
غدا غادي يلعب البايرن اول ماتش ديالو فالبطولة ضد هيرتا بيرلين.
