مصطفى الشاذلي – كود سبور//
بزاف ديال دول أمريكا الجنوبية (كونميبول) عبرت عن استعدادها باش تترشح لتنظيم كاس العالم 2030.
البارح خرج الرئيس الإكوادوري لينين مورينيو بتصريح أكد فيه أنه اقترح على إيفان دوكي رئيس كولومببا، ومارتن فيسكارا، رئيس بيرو باش يتقدموا بتنظيم مشترك.
المشكل فين كاين هو أن دول أمريكا الحنوبية، لي كتسمى كونميبول ولات ضاغطة بزاف، بغات تنظم المونديال باي طريقة في 2030، باش تحتفل بالذكرى المئوية للمونديال الاول لي تقام في الأوروغواي 1930.
الأرجنتيني والتشيلي والأوروغواي باغيين ينظموا هاد الحدث، وحتا انجلترا وإيرلندا وبلغاريا وصربيا ورومانيا
دابا، المغرب واش مازال مطايف على تنظيم لكوب ديموند في 2030، لحقاش ماخرجش حتا بشي بلاغ رسمي حتى الآن.
كانت هناك فقط تلميحات بأنه غادي يتقدم بملف مشترك مع إسبانيا والبرتغال، لكن ما كاينش شي حاجة رسمية، مازال ضارب الطم، في الوقت لي إسبانيا والبرتغال مشاو بعيد في الاتفاق ديالهم وسبق ليهم تأكيد ذلك رسميا.
