كود كازا ///

كيفاش لكلان دالماجيدي السكرتير الخاص لمحمد السادس كيزدهر على ظهر الهولنديك الملكي » هادا هو العنوان اللي داتو « افريكا انتيليجانس » يوم 14 شتنبر 2020 فمقال طويل.

قبل ما نرجعو لاهم ما جا فالموضوع٬ “كود” سولات واش هاد الشي كولو صحيح وواش كاين هاد التوجه؟ مصدر مقرب قال ل”كود” باللي هاد الموقع بالضبط : افريكا انتيليجانس٬ داير هادي اشهر ماشي غير المقال ديال الجديد٬ حملة ممنهجة على منير الماجيدي وباللي المستهدف ماشي غير الماجيدي وصافي بل المغرب ورموز سيادته.

المصدر اضاف ل”كود” “بكل موضوعية راه اللي جا فالمقال كلام فارغ وعاري من الصحة. راه كل واحد ممكن يتأكد باللي اللي تنشر ترهات”.

دابا اش جا فالمقال اللي تقدم كتحقيق. فيه باللي الماجيدي « كيقوي » شركاتو عبر عقود مع الهولدينك الملكي « المدي » وذلك عبر جوج: خوه المهدي الماجيدي وصاحبو زهير الفاسي الفهري اللي ولاو « شركاء مفضلين » عند الهولدينك الملكي.

المقال هدر على « اف سي كوم » وسيطرتها على قطاع اللوحات الاشهارية بالمغرب والشركات اللي خرجو منها وقال باللي هاد الشركة ديال الماجيدي وباللي دار شركة جديدة مكلفة بليڤيمانسيال اسمها « فاسين » وكيشرف عليها رضى الفيلالي.

وهدر كذلك على عقود فالتلفون مع شركات ناڤيرا =ديال الطاقة وتابعة ل »المدى » وباللي واخا خدام مع « اتصالات المغرب » من خلال « جي سي ام المغرب » كيخدم تحت الدف مع « انوي » المنافس ديالو واللي حتى هو تابعة ل »المدى ».

وكتب المقال باللي خوه مهدي الماجيدي « اي ام  ديجيتال » اللي دخلات فشراكة مع شركات فرنسية. هادي كتهتم بالامن المعلوماتي والمراقبة حتى بالدرون او بالڤيديوم٬ يقول المقال

هاد الشركة٬ يضيف المقال٬ فملكية فاطمة الزهراء الصفريوي مرات مهدي الماجيدي
وفاللخر هدر المقال على زهير الفاسي الفهري اللي ولى على راس « بيرماريوس » التابعة ل »سيجر » =الهولدينك الملكي=

المقال قال باللي حتى حد ما كيوقف مملكة الماجيدي وعائلتو. لا حكومة لا احزاب لا مجتمع.

المصدر المقرب شدد فتصريجو ل”كود” باللي هاد الشي كيبين باللي ما جا فالمقال كذوب. المغرب بلاد كتحكمو قوانين وهادا صورها بلاد بلا قانون. باين المستهدف منو يعيد مصدر “كود”.

الموقع مقرب من المخابرات الفرنسية وماشي بعيد يكون استهداف من لوبي فرنسي خسر بزاف مع مغربة المقاولات والشركات