كود كازا ///

هادي مدة كانت قرارات غبية فكازا باش يزيرو ليريسطو اللي كيخالفو القوانين اللي مديورة دابا زمن كورونا. بحال الموسيقى ما تكونش والشطيح حتى هو. البركة فالكونطوار ممنوعة. غير هاد القوانين اللي غريبة اصلا ما طبقاتش على كاع ليريسطو فكازا.

بحال ديك الحملة اللي وقعات هادي اشهر فكازا ضد ليريسطو تم استثناء داك “لوبيري” وخوتو ف”لاكورنيش” التابع ل”بالموري” او مطاعم طاطا مرجانة.

نفس القصة تعاودات دابا. صحاب المطاعم فكازا اتصلو ب”كود” وقالو لينا “حنا بغينا السلطات طبق علينا اللي طبقو على طاطا مرجانة. بلا زيادة بلا نقصان”.

كاينة السلطات متبعة واش هاد المطاعم محتارمة الاجراءات المعمول بها فزمن كورونا. دخلات وشافت كلشي. كيدور ديما وعندها فيديوات. طبعا من بعد كاينة لجنة كتتاخد القرارات بناء علي تقارير كتوصلها. هاد اللجنة ممكن تحيد الرخصة ديال المشروبات الكحولية لمدة محدودة او بصفة نهائية على حساب جسامة المخالفة.

هاد السيمانا كان يتوقع تخرج قراراتها. بل شي وحدين سبقو كلشي وهدرو على عقوبات غادية تنزل علي “لوبيري” وعلى “كابيستول” وعلى “كاسكاد” وغيرهم من ريسطورات عين الدياب.

كانت غادية تكون سابقة ان “لوبيري” يطبقو فيه القانون وما يبقاش استثناء. لكن ما خرج حتى شي قرار.

واش القرار جاي فالطريق ولا تضمس قبل ما يخرج. نتسناو ونشوفو. بزاف صحاب ليريسطو باغيين يفرحو ويقولو “يحيى العدل”