كود كازا ///

مشى ملك هرهورة ومشوه معمارها رئيس مجلسها السابق الاستقلالي فوزي بنعلال بعد اقالته من قبل الداخلية ولكن فضايح التعمير مازال مشوهة هاد المنطقة.

اخر فضايح هاد الشي هو ما وقع فمطعم وحانة فينكس دور phénix d’or اللي كاين فالشارع الرئيسي واللي فيه كيدوز محمد السادس مرة مرة. واييه شوفو الزعامة. ولكن شكون اللي وقف هاد الشي؟ ماشي السلطات وغير السكان اللي ناضو ليه وضربو ليه الطر.

هاد الشي كيكشف باللي الخروقات فهاد الجماعة ولات مدرسة. مصدر من الجماعة قال ل”كود” باللي كاينين نافذين كثار كيحميو مصالحهم وكيرعاو الفساد. هادو ما كيتسقوش شكون رئيس الجماعة ولا شكون مكلف بالتعمير.

المصدر جبد ل”كود” مول هاد المطعم اللي دار زاد ايطاج لا رخصة بلا تصميم موافق عليه كيف كينص على هاد الشي القانون.

المصدر اكد ل”كود” ان هاد المافيا كتحكم فالتراخيص. البسطا اللي باغيين يعيشو من تجار وسكان ووو كيتخسخو وما كياخدوش احيانا الترخيص فامور عندها علاقة بالتعمير وهادو بحال مول المطعم بنى بلا ترخيص كاع.

دابا هاد الداخلية اللي جرات على ملك هرهورة بنعلال فين كاينة ما كتشوفش اش كيوقع.