عفراء علوي محمدي- كود//

بمجرد ما خرجو شي محامين يغوتي بسباب سلسلة “قهوة نص نص” اللي كتبثها الأولى، ناضو شي ممرضين وسككين يحتجو حتى هوما على إنتاجات رمضانية، بنفس الكريقة، بحجة ان هذ الإنتاجات كتهينهم وكتشوه بسمعة مهنهم.

الممرضين عندهم المشكل مع “بنات العساس”، اللي ناداو بالمقاطعة ديالو، فتدوينات كثيرة على مواقع التواصل الاجتماعي، وهذشي ماوقفش هنا، بحيث كاين اللي فيهم طالب بتوقيف العرض ديال المسلسل، واخا كيتعتبر لحد الساعة لأنجح والاكثر مشاهدة من طرف الجمهور، بحيث حقق 7 ملايين مشاهدة.

واعتبرو الممرضين أن الممرضة اللي جات فالمسلسل كتبان ماعندهاش شخصية، وبدون كرامة، والمسلسل مازال كيكرس الصورة النمطية ديال أن الطبيب حسن من الممرض، وكيتحكم فيه كيف بغا.

من جهتهم، الموظفين ديال السكك الحديدية ناضو ينتقدو مسلسل “كلنا مغاربة” اللي كتبثو القناة الثانية، بحيث فالحلقة 10 من المسلسل، كيقول انه تم تداول اسم السككي “عبد الله الشومينو” بشكل استفزازي واحتقاري فحق جميع موظفين السكك الحديدية.

وراسلات الجامعة الوطنية لمستقبل السككيين، المنضوية تحت لواء الاتحاد الوطني للشغل، رئيسة الهيئة العليا للاتصال السمعي البصري “الهاكا”، كتشكى من هذ المسلسل، وكتحتج ضدو، وطالبات باش تتدخل فالموضوع.

وهذ التصرفات، مراقبين كثار شافو انها نوع من البسالة والفوضى اللي كتصادر فحق الفنان فالتعبير والإبداع، حيت الى جا كل مهني يغوت لان واحد من الشخصيات او الادوار فعمل ما ماعجبوش، حيت كيمتهن المهنة ديالو، غتولي الرقابة على الفن، وماغايخدش الفنان راحتو فالإبداع كما ينبغي.