كود الرباط//

حركت قضية الهبات بركة مجلس مدينة سلا الآسنة. هبة قدمها الملياردير الراحل ميلود الشعبي لمجلس مدينة سلا ف 2006 لا أحد يعرف مصيرها.

انعقاد دورة أبريل أعاد طرح هذه النقطة. عمدة المدينة يتحدث عن رفع اليد عن القطعة الأرضية اللي كتبلغ المساحة ديالها 2 و نصف هكتار. هاذ الشذ والجذب تطرح بمناسبة إدراج المجلس لنقطة في دورة أبريل تتعلق بقبول الهبات.
الشعبي قدم لجماعة سلا فالمجموع 3 هكتارات ونصف. جوج ونص للمقبرة وواحد للمسبح الأولمبي.

لجنة المالية اللي اجتماعات هاذي سيمانة، عجزت عن تقديم جواب لأعضائها حول مصير هبة الشعبي.

هاذ القضية نقطة في بحر ملفات كبيرة ومعقدة تتخبط فيها جماعة سلا اللي كتعيش أسوا أوضاعها منذ عقود بعدما طاحت فعجز مالي، وتعثرت عدد من المشاريع ديالها.

فظل هاذ الأوضاع المدينة تدفع ثمن عدم تفرغ رئيس المجلس جامع المعتصم المشغول مع رئيس الحكومة حيث هو مدير الديوان ديالو. والاغلبية لا تملك مشروعا حقيقيا لتنمية مدينة مليونية.

وكاين نواب العمدة اللي ملي تنتاخبوا غبروا مكيحضروا دورات ومكيحضروا لجان. والسؤال علاش متفعلتش مسطرة الاقالة، و اللي كيحضروا خدامين على ملفات عندها ارتباط بطموحاتهم الانتخابية والمصلحية والمعارضة تعاني بدورها ضعفا غير مسبوق. كاين شي أعضاء مفاهمين والو كيحضروا يوقعوا ويمشيو وأغلب الدورات كيقرر فيها من 10 حتا ل 30 عضو، و اللي كيقرر أصلا نواة صلبة من ثلاثة حتا ل 6 ديال الاعضاء ضمنهم رجال أعمال وأصحاب مصالح كبيرة جدا بالمدينة، ويستمر الوضع على ما هو عليه.